‘Maqam’ ansambli ve qırımtatar ameliy-dekorativ sanatınıñ ustaları Lehistanda (Polşada) keçken ‘Folkovıye Mokılaykı’ Halqara halq muzıka festivalinde qırımtatar medeniyetini taqdim ettiler.
Dekabrniñ 8-11 künleri Lüblin şeerinde olıp keçken festivalde çeşit memleketlerden kelgenler iştirak etti. Olarnıñ arasında Lehistan, Sırbistan, Norvegiya, Slovakiya, İsrail, Macaristan ve Qırımnıñ vekilleri bar edi.
Mezkür leyhanıñ kooridnatorı Tatyana Kuşkanıñ aytqanına köre, tedbirniñ esas maqsadı — bütün dünya ananeviy muzıkasınıñ taqdimi. Kuşka "Avdet"ke ‘ Qırım bu Festivalde birinci iştirak etip. Qırımtatarlanrıñ folklor muzıkasını ‘Maqam’ ansambli tanıttı’- dep ikâye etti. Bundan da ğayrı, folklor ansamblleriniñ çıqışlarından ğayrı tedbir çerçivesinde nağış, eykelcilik, çölmekçilik mahsulatı taqdim etildi. Böyle etip, qırımtatar el ameliy-dekorativ sanatını ‘Çatır Dağ’ icadiy birleşmeniñ azası, çölmekçi ressam Eldar Gusenov, ‘Arslan’ yaşlar cemaat teşkilâtınıñ azası, altın nağış ustası Alime Abibullayeva ve quyumcı Elmira Asanova taqdim ettiler.
Açılğan sergide ustalarnıñ yañı ve pek meraqlı işlerini, şu cümleden, kilim, nağış tehnikasında yapılğan dekorativ pannnolar, çölmekçilik tabaqları, quyumcılıq mahsulatı, nağışlar ve diger işler.
Bundan da ğayrı, sergi devamında ustalar ameliy sanat saasında master-klasslar keçirdi. Mezkür tedbirden öz tessuratlarınen festival iştirakçisi Eldar Gusevov paylaşa: ’Çetel yerlerge, em de halqara festivallerge barmaq — er vaqıt pek meraqlı. Başqa bir ülkeniñ medeniyeti, mimarlığı, tili ile tanışuv insannı zenginleştire, oña ilham bağışlay. Lehistan bizni sıcaq ve büyük meraqnen qarşıladı. Qırımtatar medeniyetimizni sever, biler ve sabırsızlıqnen körüşüvlerini bekleyceklerine ümüt etem. Çünki Qırım — misalsiz medeniy-tarihiy yarımadadır, biz ise tamır halqı olıp, bu topraqlarda evel-ezelden bulunğan qavim, halq ve medenieyetlerniñ zengin maneviy mirasınıñ taşıyıcılarımız.
Elmara Mustafa