Halqqa hızmet etkenlerni mesüliyetlikke çağırmaq

11.05.20160:19

‘Yañı quvet’ delegat gruppası ‘QMC Yuqarı Şurası ve Ukraina yerli öz-özüni idare etüv organlarına kelecek saylavlarından dolayı qırımtatar milliy yerli öz-özüni idare etüv organlarınıñ eñ-evelã yapılacaq tedbirler aqqında’ Qırımtatar Qurultayınıñ qarar leyhasını azırladı.

Teklif etilgen bu vesiqa nevbetteki maddelerni közde tuta:

Birinciden, qırımtatar Meclisi 2010 senesi 31 dekabr kününe qadar QMC YŞ-nıñ qırımtatar Qurultayı teklifine binaen saylanılğan deputatları içün vazifelerni azırlamaq zarur. Ekinciden, QMC YQ deputatalarına saylanılğanlarından er yarım yıl keçken soñ öz deputatlıq faaliyeti aqqında esabatlar azırlamaq. Üçünciden, QMC YŞ-na deputat namzetlerniñ cevdelini Qurultay tarafından tasdiq etilmesine tek faaliyetleri Qurultay tarafından qanaatlendirici tanımağanda öz deputat vazifesini qaldıracaqları aqqında arizanı imzalağan soñ teslim etmektir. Dürtünciden, Qurultay teklifinen saylanılğan deputatlar, olarnı devlet hızmetiniñ icra organlarına 1-3 kategoriya vazifelerine tayin etken alda deputatlıq vazifelerini göñülli qaldıralar. Bu qararnıñ amelge keçirilimesini nezaret etmekni leyha muellifleri Qırımtatar Qurultayınıñ Teftiş Komissiyasına avale etmekni teklif eteler.

 

‘Yañı Quvet’ delegat gruppasınıñ yolbaşçısı Eskender Bariyevniñ fikrine köre, Qurultay teklifinen saylanılğan deputatlar QMC YŞ-nda qırımtatar halqınıñ menfaatlarını taqdim eteler ve halqnıñ ögünde öz faaliyetleri içün mesüliyetli olmalılar.

‘Lãkin, QMC YŞ deputatlarınıñ faaliyetlerini talil etsek, şusı añlaşıla ki, bütün bu yıllar içersinde Qırımtatar Meclisi deputatlar içün vazifelerni tayin etmedi, deputatlar faaliyetleri aqqında esabat bermeyler, deputatlarnıñ qanun icadında faal olmağanları közetile,’- dep qayd ete Eskender Bariyev.

Aynı bu sebeplerden dolayı mezkür qararnıñ ğayesi peyda oldı. ‘Yañı Quvet’ delegat gruppası V Qırımtatar Qurultayınıñ delegatlarına bu qararnı 2010 senesi 28-29 avgust künleri olıp keçecek sessiyasında qabul etilmesini rica ete’,- dep qoştı Eskender bey.