haci Emirali Ablayev Ukraina Muftileri Keñeşiniñ Reisi olaraq saylanıldı

11.05.20160:19

İyül 21 künü Aqmescitte Qırım müsülmanları diniy idaresinde Müsülmanlarnıñ diniy idareleri ve merkezleriniñ Bütünukraina Keñeşi – Ukraina Muftileri Keñeşiniñ nevbettentış oturışı keçirildi.

Müftiyatnıñ resmiy saytı haber etkeni kibi, Keñeşiniñ kün tertibinde livanlı Ahmad Tamim yolbaşçılığında Ukraina müsülmanmanları menfatlarına basqı yapılğanınen bağlı yaqında yüz körgen vaqialar munasebeti ile Keñeşniñ işi muzakere etildi. Böyleliknen, toplanğanlarğa habaşitler sektasınıñ qanunğa qarşı arketleri aqqında haber berildi.

Oturış devamında Keñeş işiniñ teşkiliy sualleri, diniy idareler arasında işbirlikniñ pekitilüv kerkeligini muzakere etildi. Hususan, Milletler ve dinler işleri boyunca devlet komitetiniñ qapatılması munasebetinen deñişmeler ile yañı muarririyette “Müsülmanlarnıñ diniy idareleri ve merkezleriniñ Bütünukraina Keñeşi – Ukraina müftileri keñeşiniñ işi aqqında nizamname” qabul etildi. Oturış devamında Hacnıñ teşkiliy sualleri – Ukraina müsülmanlarına kvotalar berilmesi muzakere etildi. Keñeşiniñ Reisi vazifesine Qırım Müftisi haci E.Ablayev saylanıldı.

 

Malümat içün:

2009 senesi 15 aprel künü QMDİ teşebbüsi ile “Ukraina devlet milletler ve dinler işleri boyunca komiteti yanında Ukraina müsülmanlarınıñ diniy idareleri ve merkezlerniñ vekiller keñeşi” teşkil etildi, oña daa Müftiler Keñeşi deyler. Bu keñeşniñ terkibine QMDİ, “Umma” UMDİ ve “Kiyev Müftiyatı” kirdi. Keñeşniñ maqsadı – devlet qurumlarınıñ müsülman teşkilâtlarınen işine yardımcı olmaq, İslam dinini kütken vatandaşlarnıñ menfatlarını temsil etmek, Ukraina müsülmanlarınıñ diniy idareleri ve merkezleri arasında işbirlik tutmaq. Müftiler Keñeşiniñ reisi azları tarafından bir yılğa saylanıla.

Elmara MUSTAFA