İyun 6 künü “Yıldız” mecmuası idaresinde Eşref Şemyi-zade adına edebiyat mukâfatı boyunca komissiyanıñ 2009 senesi içün konkurs ğalibini belgilev maqsadınen yekünlev toplaşuvı keçirildi. Eski-Qırımlı belli metsenat Ebazer Emiraciyevniñ “Can yürekten” fondı tarafından tesis etilgen Eşref Şemyi-zade adına edebiyat mukâfatı bu yıl ekinci kere taqdim etilmekte. Bu nufuzlı mukâfatnen birinci kere “Devir aralıqlarında” kitabı içün merhum yazıcımız Safter Nagayev taqdirlengen edi.
Bu sefer komissiyağa tüşken materiallardan konkursqa üç nominant seçildi: 1. Nazle Yayayeva. a) “Eşref Şemyi-zadeniñ yaratıcılığında dialoglarnıñ qullanıluvı” (maqale). “Yıldız” №5; b) Eşref Şemyi-zadeniñ “Közyaş divar” destanı adlı ders işlenmesi (açıq ders). “Til ve edebiyat dersleri” adlı metodik qullanma. 2. Ayşe Kokiyeva. “Ayşe Kokiyevanıñ qırımtatar tercimanlıq sanatına qoşqan issesi” (“Çetel edebiyatı” dersligi içün yapılğan tercimeler). 3. Riza Fazıl. a) Riza Fazıl. “Qalem ucından”. Eki tomlıq saylama eserlerniñ 1-ci tomı (2009 s.); b) Eşref Şemyi-zadeniñ saylama eserleri. Üç tomlıqnıñ 1-ci ve 2-ci tomları (2008 ve 2009 ss.).
Komissiya azaları: Dilâver Osman (reis), Şeryan Ali, Ebazer Emiraciyev (mukâfatnı tesis etici), Uriye Edemova, İbraim Çegertma (kâtip), Seyran Suleyman, Aydın Şemyi-zade (aprel ayında Aqmescitte bulunğanda, öz fikirlerini yazıp qaldırğan edi) konkursqa keçken eserlerni muzakere eterek, gizli rey berüv vastasınen bir ağızdan Riza Fazılnı konkursnıñ ğalibi dep tanıdılar. Bu sayede nominantnıñ qırımtatar edebiyatına qoşqan ğayet salmaqlı issesi ve Eşref Şemyi-zadeniñ ayatı ve yaratıcılığını populârizlev saasında yapqan büyük hızmetleriayrıca esapqa alındı.
Mukâfat büyük şairimiz Eşref Şemyi-zadeniñ doğğan kününe – iyun 21-de tantanalı sürette taqdim etilecek.
Mukâfat boyunca komissiya