Aqmescit başı Rusiyeniñ eñ yaramay şeer yolbaşçılarından biri oldı

02.02.201710:00

Aqmescit (Simferopol) memuriyeti başı Gennadiy Baharev Rusiyeniñ eñ yaramay şeer yolbaşçılarından biri oldı.

Bu aqta Rusiye Federatsiyası ükümeti yanındaki Maliye universitetinen beraber «Reyting» malümat kommunikatsiyaları merkezi tarafından teşkil etilgen 2016 senesi Rusiye şeerleri yolbaşçılarınıñ işi semereligi cedveli (reyting) bildire. Cedvelge binaen, Aqmescit memuriyeti yolbaşçısı Gennadiy Baharev 88 yerden 81-ci yerni aldı.

Cedvelge Rusiyeniñ 88 şeer yolbaşçısı kirsetildi – bu, RF subyektleri paytahtlarınıñ yolbaşçısları, bunen beraber, eñ büyük maliye-iqtisadiy merkezniñ beş temsilcisi: Magnitogorsk: Naberejnıye Çelnı, Novokuznetsk, Tolyatti ve Soçi. Şeer yolbaşçıları reytingi üç gruppadan ibarettir. Ekspertler birinci gruppadakilerni (1−25 yer) yetekçi olğanlarını saya, ekinci gruppadakilerni (26−63 yer) − orta soyları, üçünci gruppadakilerni (64−88 yer) − autsayder olğanlarını saya.

Eñ yahşı ise, Tümen şeer yolbaşçısı Aleksandr Moora sayıldı, bunen beraber, birinci üç yetekçi sırasına Qazan ve Ufa şeer yolbaşçıları kirsetildi. Eñ yaramay Birobican, Omsk ve Mahaçkala şeer yolbaşçıları sayıldı.

Qayd etmek kerek ki, Aqmescit sakinleri Baharevniñ işinde eñ çoq şeer merkeziniñ tamir etilüvini begenmedi ve bunı diversiya dep adlandırdı, bunen beraber, kommunal hızmetleriniñ qarlı ava olğanda işine şikâyet etti.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Автор: Редакция Avdet

Редакция AVDET