Орталан (Кадирова) Урие Абибуллаевна 1990 сенеси апрель 29-да Орталан коюнде дюньягъа кельди. 1997–2007 сенелери Орталан (Земляничное) I–III басамакълы мектебинде окъуп мезун олды. Мектеп талебеси экенде, Юнус Къандым адына «Къырым-меним Ватаным», район ве джумхуриет ярышларында намзетли ерлерни къазанды, бир чокъ диплом ве ярлыкъларнынъ саиби:
– 2006 сенеси эсас ве махсус фенлер боюнджа Бутюн Украина
талебелер олимпиадасынынъ III басамагъында «Къырымтатар
тили ве эдебияты» боюнджа III дереджели дипломнен;
– 2007 сенеси В. И. Вернадский адына Таврия Миллий Универ-
ситетинде «Къырымтатар тили ве эдебияты» фени боюнджа кечи-
рильген олимпиадада III дереджели дипломнен;
– 2007 с. Къырымтатар тилинде талебер иджадынынъ IV Джум-
хуриет фестивалинде, Юнус Къандым адына «Къырым – меним
Ватаным» ярышында «Несир» номинациясында I дереджели
дипломнен;
– «Ассамблея-2007 Крымской Малой Академии искусств и
народных ремесел» черчивесинде «Журналистика» саасында
дипломнен мукяфатландырылды.
«Орта-Алан» мектеп газетасы да онынъ муаррирлиги алтында
нешир этиле эди.
2007 сенеси журналистика саасында Къырым Кичик Илимлер Академиясынынъ керчек азасы оларакъ къабул олунды.
2006 сенеси «Журналистика» саасында курсларыны битирди.
2012 сенеси В. И. Вернадский адына Таврия Миллий Университетинде къырымтатар ве шаркъ филологиясы факультетининъ къырымтатар тили ве эдебияты болюгини аля дереджеде битирди.
Талебелик чагъындан берли (2006 с.) «Ильхам» эдебий клубынынъ азасы.
2009 сенесинден «Маарифчи» къырымтатар тасиль хадимлери Ассоциациясынынъ азасы.
Асан Хайретдиновнынъ «Ватаным» , Dj Bebek, Асие Саале, Марлен Сеттаров, Разие Сейтаблаева, Алие Бекирова, Элина Сосновская киби, ве земане эстрадамызда чокъусы белли йырджыларымызнынъ иджра эткен йыр сёзлернинъ муэллифидир.
2012 сенеси Др. Ахмет Ихсан Къырымлы Эдебият Ярышында икяе саасында рагъбетлендириджи мукяфат къазанып, лауреат намзетине наиль олды.
Кене де шу сене Исмаил Гаспринский аяты ве иджадына багъышлангъан ярышта III-нджи ерни къазанды.
Онынъ язгъан икяе, шиир, макъалелери «Къырым», «Янъы дюнья», «Маариф ишлери», «Сувдагъ сеси», «Судакские вести», «Авдет» газеталарында ве «Йылдыз», «Несиль», «Арзы» меджмуаларында басылды.
2007 сенеси «Вдохновение» сербест иджадий ассоциациясы нешир эткен «Вдохновенье – это праздник души!» джыйынтыгъында рус тилинде шиирлери дюнья юзюни корьди.
«Ильхам гульдестеси» (2008 с.), «Ильхам гульдестеси» (2009 с.), «Ильхам» альманах (2013 с.), «Сюргюнлик балаларнынъ козьлеринен» («СОНАТ», 2008 с.), «Гонъюллер джошкъанда» (2016 с.) джыйынтыкъларында шиир ве икяелери дердж олунды.
Бундан гъайры турк неширлеринден «Çağdaş Kırım Tatar Öyküsü» (Hece yayınları, 2015) антологиясында, «Günsel Sanat» ве «Temrin» дергилерине икяелери ве «Kırımın sesi» газетасында очерклери басылды.
Америкалы языджы, фотограф Greg Constantine-нинъ 2015 йылында бутюн дюньягъа такъдим этильген «Nowhere People» китабында Уриенинъ ингилиз тилинде «Qırım» шиири басылды.
2018 сенеси Киевде «Антологія молодої української поезії III
тисячоліття» джыйынтыгъында шиирлери къырымтатар ве украин тиллеринде басылды.
Айны сенеси муэллифнинъ Урие Орталан тахаллюсинен «Сары гуль» несир эсерлер ве очерклер китабы дюнья юзюни корьди.
Джыйынтыкъта языджы, шаир ве журналист Урие Орталаннынъ (Кадирова) чешит йыллар девамында язгъан икяелери ве очерклери кирсетильди. Эдибенинъ эсерлеринде халкъымызнынъ башына келип кечкен мушкюлликлернен бир сырада земане яшларымызнынъ къайнакъ омюри тасвирлениле.
2011 сенесинден берли МБОУ «Земляничненская средняя школа» Орталан мектебинде оджа ве айны заманда 2015 сенесининъ апрель айындан башлап, «Сувдагъ сеси» газетинде баш муаррир вазифесинде чалышмакъта.
