Qırımda 83 yaşında, koronavirus infektsiyasınen bağlı ağırlaşma sebebinden yazıcı, pedagog, oyuncı, yırcı, ilk televizion qırımtatar bala programmasınıñ müellifi ve alıp barıcısı Subiye Nalbandova vefat etti.
Anasınıñ ölümi aqqında, Facebook saifesinde belli ukrain rejissöri Ahtem Seitablayev bildirdi.
Subiye Nalbandova 24 mart 1938 senesi Qırımda doğdı. 1944 senesi 18 mayıs künü bütün qırımtatar halqınen bereber, ailesini Qırımdan Mari MSSC-ne zorbalıqnen sürgün ettiler. Daa soñra aile Tacikistanğa köçti. Subiye Nalbandova Leninabadsk muzıka oquv yurtını bitirip, Taşkent teatr institutına kirdi. 1990 senesi aile vatanğa qayttı, mında Subiye hanım Qırım medeniyet oquv yurtında vokal ve sana nutqu derslerini bere edi. 1992 senesi Subiye Nalbandova «Krım» devlet teleleradio kompaniyasınıñ qırımtatar muarririyetinde çalışmağa başladı ve qırımtatar medeniyeti tarihında «Merabañız, balalar» adlı ilk bala teleyayınnı meydanğa ketirdi.
Avdet muarririyeti Subiye Nalbandovanıñ doğmuş ve yaqınlarına baş sağlığını tiley. Allah rahmet eylesin!
