2-сентябрь акъшамында ичтимаий агъларда кедерли хабер даркъалды: 32 йылдан берли Акъместджитте яшагъан Миллий арекемизнинъ эски ве фааль иштиракчиси, гъает муляйим ве миллетпервер инсан Шефикъа апте Консулнынъ агъыр хасталыкъ нетиджесинде юреги урувдан токътады. Бу сененинъ февраль айында джемаатымызнынъ векиллери оны, 84 яшны толдургъаны мунасебетинен, хайырлагъан эдилер…
Шефикъа апте фаджиалы къарсанбалардан бала, осьмюр ве генч оларакъ кечкен несильден олып, омюрнинъ сорумларына озь къавий ирадеси, адалетсизликке къаршы турмагъа бильмеси, халкъына олгъан сынъырсыз севгиси иле чыкъты.
О, озюнинъ бу ве дигер, миллетнинъ энъ анълы ве илери векиллерине хас олгъан чизгилерини, омюрининъ сонъунадже нумайыш этип кельди. Белли ки, ойле джесюр ве тарихымызда из къалдыргъан инсанларымыз яшайышынынъ омюр тарзы — миллий арекет, макъсады — халкъымызнынъ Ватангъа къайтувы ве джумле акъларыны, шу джумледен, миллий девлетчилигимизнинъ тикленилюви олды.
Шефикъа Консул (догъма сойады Ислямова) 1937 сенеси Кок-Козьде догъды. Бойле де агъыр балалагъыны башта дженк, сонъ сюргюнлик тар-мар эттилер. О, Самаркъанд мектеплерининъ бирисинде окъуды. Китапханеджи зенаатыны менимседи ве ойле вазифеде де чалышты.1956 сенеси о, бираздан сонъ пейда олгъан, чокъ сайылы ве кучьлю олгъан Самаркъанд тешеббюсчилер гурухынынъ корюмли иштиракчиси ве, атта,къазнадары олгъан Мустафа агъа Консулнен къоранта къурдылар. Бойлеликнен, Шефикъа апте 1960-нджы сенелерининъ башында Миллий арекетимизге къошулып, Ватан давасында фааль иштирак эте башлады. Омюр аркъадашынен берабер о, Къырым миллий меселесиндеки вазиет, денъишмелер ве янъылыкълар, Миллий арекет черчивеси ве кетишатында япылгъан ишлер, уйдырылгъан махкемелер акъкъында весикъаларны язув машинкада бастырды, чокълаштырды, яйындырды. Пара ве имзалар топламакъта, топлашувларны отькермекте, мураджаат ве беянатлар азырланмакъта, Москвагъа векиллерни ёлламакъта рефигъы ве онынъ энъ якъын сафдашларына, Самаркъанд гурухнынъ ёлбашчыларына даима ярдым этип турды. Такъиплер, тинтювлер, КГБ-ге чагъырмакълар, соргъулар Консулларнынъ къорантасыны букюльтирмеди, олар ёлларындан тайпынмадылар. Аксине, япкъан ишлери адалетли, акълы олгъанында зияде эмин олып, кет-кете арекетлерини кескинлештирдилер. Яхшы йырлагъан, халкъ оюнларыны, фольклорымызны, урф-адетлеримизни, тедбирлер алып барыджылыгъыны яхшы бильген Шефикъа апте озюнден яшча олгъан, яни гъурбетте догъгъан несильнинъ арасында сайгъы-итибар къазанып, о генчлерни де миллий медениетимизни огренмесине, миллий байрамларны къайд этильмесине кутьлевий шекильде джельп этти, оларгъа бу саада озь бильгилерини ашлады.
1980 сенеси Консуллар Къырымгъа къайталр ве мында яшамагъа тырышалар. Амма оларнынъ бу ынтылувлары акимиет тарафындан кестирильди. Нетиджеде Мустафа агъа ве Шефикъа апте Краснодар улькесининъ Абинск шеэринде ерлештилер. Мында да олар кутьлевий ве фааль олгъан ерли тешеббюсчилер гурухына кошулып, белли инсанлар олалар. Ниает, 1989 сенеси Консуллар Къырымгъа авдет олалар ве бираздан Акъмесджитте ерлешелер. Бундан эвель эки инфаркт кечирген Мустафа агъа 1993 сенеси вефат эте. Миллий арекетнен бир нефес алгъан, халкъынынъ омюри ве менфаатынен яшагъан Шефикъа апте ич бир — олсун сиясий, олсун медений — тедбирлерден четте къалмамагъа тырышты. Къурултайларда мусафир олды. Миллий телевизион программаларында иштирак этип кельди. 2014 сенеси башымызгъа тюшкен вакъиаларны о, кескин такбих этти. Бу акъта АТР телеканалынынъ яйынларында дефаларджа чыкъышлар япты, халкъымызны бойсунмамагъа, бирлик-бераберликте олмасына, умют беслемесине чагъырды.
Бир къач сене эвель исе, шу джумледен, Миллий арекетимизге багъышлангъан онынъ «Достларым — меним йырларым» адлы джыйынтыгъы дюнья юзюни корьди.
О, даима миллий девлетчилигимиз тикленмесини, халкъымыз севимли Ватанында саип олмасыны ве чечекленип яшагъаныны арзу эткен ве бунъа ич шубеленмей ишангъан, кулер юзлю, йымшакъ гонъюлли, муляйим, айдын инсан эди ве ойле де эпимизнинъ хатырамызда яшайджакътыр.
Шефикъа апте Консул вефат эткени мунасебетинен онынъ джумле якъынларына терен тазие бильдиремиз ве баш сагълыгъы тилеймиз.
Алла рахмет эйлесин. Яткъан ери дженнет олсун.
Меркезий Миллий къурум азалары, достлары, сафдашлары, бир гурух Миллий Къурултай мебуслары.
