Къырымгъа 1989 сенеси авдет олгъанындан берли Акъмесджитте яшагъан Миллий арекетимизнинъ фааль иштиракчиси ве белли джемаатчы Къуртсеит Сулейман огълу Абдуллаев юрек хасталыгъы нетиджесинде, арамыздан айырылып, бу фаний дюньяны терк этти.
Къуртсеит 1955 сенеси Озьбекистаннынъ Шахрисябз шеэринде догъды. 1965-нджи сенеси оларнынъ къорантасы башта Баканка къасабасына, сонъра Крымск шеэрине кочьти. О, мында, Краснодар улькесинде, генчлигинден Миллий арекетке къошулды, КъМАТ (ОКНД) азасы ве халкъымызнынъ менфааты огърундаки озь ишлеринен «экстремист» ярлыгъыны къазангъанлардан олды.
1980-нджилернинъ сонъунда – 1990 сс.башында къутьлевий авдет ёлуна тюшкен ватандашларымызнынъ эв-мескен къурмакъ ичюн ресмий тарзда арса айырмагъа кесен-кес истемеген ерли акимиет меджбур этти оларны бу меселени къайтарув тешеббюсчилиги – «самовозврат» ёлларынен чезмеге.
Акъмесджит ве Къырымнынъ базы дигер районларында мезкюр муим ишлер координаторлыгъынен огърашкъан бир къач джемаатчыларымыз арасында Къуртсеит бейнинъ иштираги чокъ салмакълы ве эмиетли олды.
О, Миллий Къурултайнынъ бир къач чагъырувларнынъ мебусы (делегаты), Меркезий Миллий къурумынынъ ве Тефтиш комиссионынынъ азасы сайланылды, сонъки отуз йылдан зияде ичинде ярымадамызда не къадар сиясий акциялар отькерильген олса, деерли, эписинде, базыларында тешкилятчылар сырасында, иштирак этти. Озь фааллиги себебинден, атта, шовинистлернинъ хиянет уджюмине огърагъан эди.
Сонъки йыллары ватандашларымыз узеринде нидже-нидже махкемелер олып кечсе, тырышты эписине барып, сиясий мабюслеримизге гонъюльдешлик, оларгъа къаршы косьтерильген акъсызлыкъ, адалетсизликке итираз бильдирмеге. Бу себептен озю де, о махкемелернинъ шевкъатсыз укюминен джоремелерге огърагъан эди.
Достумыз, сафдашымыз хатырамызда Ватаныны, миллетини севген, оларнынъ дегерлигини къорчаламагъа даима азыр олгъан ве бу ишни озюне вазифе деп бельгилеген, месулиетли, алчакъгонъюлли инсан сыфатында къаладжакътыр.
Къуртсеит Сулейман огълу Абдулла вефат эткени мунасебетинен онынъ къорантасына, беш эвлядына, къардашларына ве дигер якъынларына терен тазиемизни бильдиремиз, сабырлар ве баш сагълыгъы тилеймиз.
Алла рахмет эйлесин.
Миллий Къурултай мебусларнынъ бир гурухы, достлары, сафдашлары.
