Халкъымыз невбеттеки джоюкъкъа огърады: ходжалыкъ, девлет, джемаат ишлеринде корюмли бир эрбап, ёлбашчы вазифелерини мувафакъиетли эльде эткен Ремзи Хаваджы девамлы хасталыкътан сонъ фани дюньямызны терк этти.
Ремзи агъа 1948 сенеси Ташкентте догъулды. Онынъ бабасы — темелли багъчасарайлы Феми агъа, анасы гурзуфлы Рушан апте — такъдирлерини дженктен бир къач йыл эвельси багълагъан эдилер.
Орта мектепни битирген сонъ Ремзи бей Ташкент политехника институтында окъуды, муэндис-къуруджы зенаатыны менимседи.
1970-нджи сс. яш мутехассыс оларакъ эмек фаалиетине ири къуруджылыкъ тешкилятларында киришип, бильгиси, беджериклиги, идареджилик къабилиети саесинде тез арада реберлик басамакълары боюнджа котерильмеге башлады.
Къырымгъа авдет олмаздан эвель Р. Хаваджи, озь саасында белли тешкилятчы-мутехассыс олып, энди белли бир вакъыт девамында «Узтрансспецстрой» буюк бирлешме-муэссисенинъ ёлбашчысы вазифесинде чалыша эди.
1982 с. Ватанына авдет олгъан сонъ (къорантасы бираздан онъа къошулды), кене де озь бильген саасында ишлерини девам этти: ПМК ребери олды, сонъра кениш къуруджылыкъ фаалиетини алып баргъан «Крымгражданстрой» трестине идареджилик япты.
1998 сенеси Ремзи агъа Украина президенти Къырымда даимий темсильджисининъ муавини олып тайинленди ве 10 йылдан зияде, яни нефакъагъа чыкъкъандже, мезкюр вазифени эда этти.
Не ерде, насыл вазифеде, не къадар муддет Р. Хаваджи чалышмасын, о ким олгъаныны ич бир вакъыт унутмады ве дегери, намусыны, шаныны, ихтисас севиесини сакъламагъа наиль олды, кимсеге озь миллий менсюплиги джеэтинден буларда шубеленмеге эсас бермеди.
Озьбекистанда о, Миллий арекетимизге даимий суретте маддий тарафтан салмакълы къолтуткъан инсанлардан эди. Къырымда да халкъымызнынъ такъдиринен багълы эмиетли къарарлар алмакъ эснасында, джемаат ишлеринде, айры медений тедбир-тешеббюслерге эм джемаатчы, эм де шахс оларакъ къолтутты.
Ремзи агъа Миллий Къурултайнынъ сессияларында тек даветли сыфатында дегиль, мебус оларакъ да (2002-2007) иштирак эте эди. Ерли миллий идаре къурумларынен сыкъ багъ тута, оларгъа къолундан кельгени къадар ярдым этмеге тырыша эди. Нидже инсанларымызнынъ шахсий меселелерини чезильмесинде де онынъ иштираки ал этиджи олды.
Корюмли, бунынънен берабер, алчакъгонъюлли эрбап Ремзи агъа оны таныгъанларнынъ хатырасында бильгили ве теджрибели мутехассыс, адалетли ве беджерикли ёлбашчы, халкъынынъ келеджегини самимий къайгъыргъан ве бу ёнелиште онынъ илерилемек васта-ёллаларыны тюшюнген, арекет эткен ватанпервер инсан, джанкуер ве мераметли къоранта башы оларакъ къаладжакътыр.
Ремзи Феми огълу Хаваджы вефат эткени мунасебетинен онынъ эвлятлары Динара ханым, Эсмер бей, торунларына, татасы Зера апте Феми къызы, джумле сой-акърабаларына терен тазие бильдирип, агъыр джоюкъкъа даянмакъта сабыр ве баш сагълыгъы тилеймиз.
Ремзи агъа даима Юдже Раббининъ рахметинде булунсын.
Миллий Къурултай мебусларынынъ бир гурухы, достлары, меслекдешлери, сабыкъ зенаатдашлары.
