Киевден кедерли хабер кельди: агъыр ве девамлы хасталыкътан сонъра тасили, зенааты, меслеги (призвание) ве эмек фаалиети боюнджа истидатлы журналист Гульнара Къурт-Али вефат этти.
О, 65 яшында эди…1976 с. Навои шеэринде мектепни битирген Гульнар Ташкент университети журналистика факультетине кире. Яхшы окъуй. Зенаат саиби ола. Озь шеэрине къайта ве ерли рустилли газетинде мувафакъиетли чалыша. Бираздан оны комсомол къурумларына ишке давет этелер. Гульнар, о заманлары айткъанлары киби, месулиетли вазифелерни эда эте, тешкилий ишлерде теджрибе арттыра. Амма, белли ки, омюр, такъдир инсангъа тек айдын, кунешли тарафыны дегиль, озь къусурыны да косьтерген адети бар. Даа эллиге етмеген онынъ ана-бабасы апансыздан бу дюньяны терк этелер ве Гульнарнынъ васийлигине (попечение) къардашлары къала.
О, бу уйкенлик, тата борджуны керекли киби беджерип кельди, къыз къардашларына оксюзликнинъ акъибетлерини мумкюн дереджеде йымшатмагъа тырышты.1989 с. Гульнар ханым, Навоидеки учь одалыкъ мескен даиресини Акъмесджитнинъ меркезинде бир одалыгъына денъиштире ве бойле ёлнен къардашлары иле Къырымгъа авдет ола. Буны анъгъаным себеби — инсанларымыз чешит ёлларнен Ватаннен къавушмагъа тырыша эдилер, лякин бу эльверишли усулнен (деньишмек) файдаланмагъа тек айры къоранталаргъа къысмет олды…
1990 с. язында Къырым Миллий арекетининъ тешкиляты (ОКНД) ильк мустакъиль, халкъымызнынъ арасында озь вакътында чокъ итибар къазангъан, «Авдет» газетини тесис эте. Гульнар биринджи куньден башлап онда мухбирлик япа.
«Бу къолай вакъыт дегиль эди: акимиет, сюргюнликтен озь Юртуна къайтаяткъан къырымтатарларнынъ сесини эшитмемек ичюн чокъ арекет этмекте эди. Ватандашларымыз, баба-деде топрагъынынъ бир парчачыгъыны алмакъ ичюн, ертолелер, чадырларда яшай эдилер. «Авдет»нинъ журналистлери эр кунь Къырымны бойлап юрьдилер. (…) Эм назик, эм де кучьлю-ирадели, эм юваш, эм де дуйгъулы Гульнар эр бир агъыр вазиетке, къаза-белягъа гонъюльден сеслене эди», деп язды бу агъыр джоюкъ акъкъында эшитип, Лиля Буджурова ве о девирде ян-янаша чалышкъан зенаатдашына: о, чокъ гузель инсан, аджайып журналист, дюльбер, джазибели къадын эди, – деп къыймет кести.
Гульнар 10 йылдан зияде «Авдет»теки фаалиетинден сонъ «Укринформ»ге кечти, хаберлер агентлигининъ Къырымдаки мухбири олды. Бельки де бу себептен, 2014 с. юзь берген вакъиалардан сонъ севимли Къырымны терк этип, ишини Киевде девам этти. Анасы-бабасы гъурбетликте къалгъанлары киби, о, да иджретте — Киев дживарындаки Чайка шеэри джамисинде дженазе намазы къылынгъан сонъ, ерли мусульман къабристанында джыйылды…
Гульнар Къурт-Аджи къызы Къурт-Али вефат эткени мунасебетинен онынъ къызы Инает ханымгъа, къыз къардашларына, джумле якъынларына терен тазие бильдиремиз ве тюкенмез сабырлар, баш сагълыгъы тилеймиз.
Мерхуме Алла Таалянынъ рахметинде олсун.
Зенаатдашлары, достлары, оны якъындан бильгенлери адындан Бекир Мамут.
