Yigitke
Qaydalarğa burulıp
Yoluñnı coydıñ, yigit?
Bu dünyadan saqlanıp,
Qapıña astıñ kilit…
Öz tiliñ unutılsa
Beş kapiklik mesele,
Qulaq asmaysıñ asla
Tapılmazmı bir çare?
Yatlarnen dostlaşmağa
Bumı saña ihtiyac?
Soñundan ağlanmağa
Keç olur, sen şimdi qaç!
Sen olarçün bir köpek —
Zıncır taqar boynuña!
Ötmek yerine kepek
Yañğız aşatar saña!
Qul olmaqçün çoq aqıl
Kereklimi, aceba?
Fikirlerden eñ taqıl —
Sat ta yiber bazarda!
İsteseñ qurban olmaq —
Qucaqnı duşmanğa aç,
Soñundan ağlanma, baq,
Tapılmaz bundan ilâc!
Burçaq yağsa, qar yağsa —
İçiñde taşı ateş,
Qarşıña duvar çıqsa —
Küçni toplap, al da teş!
*****
Yolcu
Yolum bitmez dünya boyu kezem,
Uçup kete taqvim yapraqları.
Yolcu mesleginden aslı bezmem —
Damarımda şu köçebe qanı.
Bir ayatlıq qadar seyaatım
Qaysı birsi tarafına bursun
Maña beşık olğan topraqlarım
Pamuq kibi yumşaq mezar olsun!
Yeryüzünde olğan bütün topraq
Vatan toprağınen qıyaslanmaz
İnanmasañ, özüñ dolaş da baq
Tuvğan yeriñ kibi yer tapılmaz!
