Aqmescit (Simferopol) ve Kefede (Feodosiya) qırımtatar faalleri yaqalanğanı aqqında haber etildi.
Böyleliknen, Qırım paytahtınıñ merkez meydanında Server Karametov, Nariman Cemilev ve Server İzmaylov yaqalandı. Qırımtatar faali Zair Smedlâyevniñ malümatına binaen, yaqalanğan kişiler İçki işler nazirliginiñ Merkeziy rayon bölügine alıp ketirildi.
Kefede politsiya hadimleri sürgünlik abidesine çiçekler qoymaq içün kelgen Suleyman Kadırovnı yaqalamağa tırıştı.
Evel haber etilgenine köre, Bağçasarayda faaller Qırım halqları sürgünligine bağışlanğan hatıra tahtası yanında, politsiya hadimleri ile bazı tartışmalardan soñ, dua keçirip oldı.
Avdetniñ evel bildirgenine köre, mayıs 17-deqırımtatar faalleri İlmi Umerov, Nariman Celâl ve Lemmar Yunusov Qırım prokuraturasına çağırıldı. Bundan da ğayrı, Aqmescit (Simferopol) rayon prokuraturasınıñ hadimleri Avdet gazetasınıñ baş muarriri Şevket Kaybullayevni yaqalavnen qorquzdı, onıñ adına nasıldır İvanov şikâyet mektübini yazdı.
İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
