Kefede qadın demiryolda elâk oldı

15.11.20168:05

Noyabr 14-te aqşam Kefede (Feodosiya) «Arkadiya» gece klubı qarşısında kran-drezina esli-başlı qadınnı urdı.

Kefe şeeri boyunca taqiqat bölüginde bildirilgen malümatqa binaen, vaqia tahminen saat 17:00-17:30-da yüz berdi.

60 yaşından büyük olğan qadın öz dostunen demiryol keçitinden keçecek edi. Bu arada keçitke demiryol kran-drezinası yaqınlaşqan edi. Naqliye yaqınlaşqanını bildirgen ses işareti berilgenine baqmadan, qadın tez-tez keçitten keçmege qarar aldı, amma yetiştirmedi. Kran-drezina qadınnı urdı ve o vefat etti.

Vaqia boyunca teşkerüv işleri keçirile, malümat Taqiqat komitetiniñ naqliyede taqiqat idaresine teslim etildi, dep bildire «Kafa».

Author: Редакция Avdet

Avdet gazetası