Qırımtatar yazıcılar birliginiñ reisi Riza Fazıl vefat etti

26.11.201621:25

Bugün, noyabr 26-da belli qırımtatar yazıcısı Riza Fazıl vefat etti. O bir kün yazıcı insultnı keçirdi, bugün ise Aqmescitniñ 7-ci hastahanesinde vefat etti.

Riza Fazıl 1929 senesi mayıs 30-da Qarasuvbazar rayonınıñ Barın köyünde köy ocasınıñ qorantasında dünyağa keldi. 1965 senesinden başlap, 1980 senesine qadar Taşkent şeerinde qırımtatar tilinde çıqqan Lenin Bayrağı gazetasında terciman, edebiy hadim, edebiyat ve sanat bölüginiñ müdiri vazifelerinde bulundı. 1980-1994 seneleri Yıldız mecmuasında başta şiiriyet bölüginiñ müdiri olıp, 1987 senesinden ise derginiñ mesül kâtibi vazifesinde çalıştı.

Riza Fazılnıñ büyük işlerinden biri şu ki, o, Qırımtatar edebiyatı ve islâm tarihında birinci olıp, bütün dünya musulmanlarınıñ muqaddes kitabı olğan Quran-ı Kerimni Qırımtatar tiline çevirip, onı 1991-1994 seneleri devamında Yıldız mecmuasında derc ettirdi. 1998 senesi ise o, Quran-ı Kerimniñ şu tercimesini ayrı kitap etip çıqarmağa nail oldı.

1993-de Ukraina Yazıcılar Cemiyeti azası olğan Riza Fazıl, 2008-de Qırımtatar Yazıcılar Cemiyeti reisi oldı.

Avdet gazetasınıñ hadimleri Riza Fazılnıñ soy-sopları, dost ve yaqınlarına teren taziye bildire. Merhum, Allahnıñ rahmetinde olsun. Biz Allahnıñ qullarımız, Oña da qaytarılacaqmız.