Bu künleri Bağçasaraydaki Hansaray azbarında peyda olğan yañı yıl naratı qırımtatarlarnıñ narazılığına ketirdi.
Esasen, narazılıq Facebook içtimaiy ağında bildirilgen edi.
Lâkin, Bağçasaray Orta camisiniñ imamı Ramazan Asanovnıñ haber etkenine köre, tünevin, dekabr 22-de şeerde körüşüv keçirildi, o yerde bu mesele muzakere etildi. Onıñ sözlerine köre, Qırım müftiyatı (Qırım musulmanları diniy idaresi) ve yerli din cemiyetiniñ ğayretinen Büyük Han camisi yerleşken saray azbarından narat alınacağı aqqında qarar alındı.
Bağçasaray tarihiy-medeniy ve arheologik qoruğınıñ saytında bildirilgenine köre, Hansaraynıñ esas meydanındaki yañı yıl naratı yanında mektep talebeleri içün keçirilgen «Kel bizge, Yañı yıl!» merasiminiñ iştirakçilerine ediyeler bağışlanğan. Bundan da ğayrı, müzey hadimleri Muqaddes Nikolay kününe bağışlanğan bayram merasimini teşkil etken edi.
