Qırımda Ceneviz qalesi tamir etile

04.01.201713:00

1991 senesinden berli ilk sefer Sudaq qalesinde tamir işleri yañıdan alıp barıla.

«Bu yerde birinci nevbetteki qazağa qarşı işler yapıla, bunı añlaşma boyunca Sankt-Peterburg şeerinden «Meandr» şirketi yapa», — dep bildirdi «Sudaq qalesi» qoruğı müdiriniñ vazifesini eda etken Vladimir Starikov.

Onıñ malümatına binaen, Sudaqnıñ baş tarihiy abidesinde esas tamir işleri Qale dağınıñ Cenüp-ğarbiy capında yapıla. İşler, 2017 senesi mart ayına qadar devam etecek, para federal bücetten ayırıla.

Orta asır abidesini tamir etüv programması ta 1968 senesi qabul etildi, amma Sovet Birligi dağılğanda işler toqtatıldı, dep bildire «Krımskaya slujba novostey» («Qırım haber hızmeti»).

Orta asırğa ait olğan diger yarımada abidelerine baqqanda, Ceneviz qalesi yahşı saqlanıp qaldı, 1970-80 seneleri keçirilgen tamir işleri ise, oña iptidaiy körünişni berdi.