Qırım sakinleri terrorist ve ekstremistler cedveline kirsetile

31.01.201710:30

«Hizb ut-Tahrir» işi boyunca yaqalanğan, davaları daa devam etken qırımtatarlar, mahkeme daa qarar çıqarmağanına baqmadan, terrorist ve ekstremistler cedveline kirsetildi.

İşbu cedvelde Emir-Üsein Kuku 3415 sanlı, Muslim Aliyev – 468, Arsen Cepparov – 2294, Rustem İsmailov – 2884,  Ayder Saledinov – 5199, Refat Alimov – 524, İnver Bekirov – 1231, Zevri Abseitov – 196, Rustem Abiltarov – 188, Enver Mamutov – 3994, Remzi Memetov – 4135, Vadim Siruk – 5362, Teymur Abdullayev – 110, Uzeir Abdullayev – 111 nomeri boyunca qayd etilgen.

Aynı bu cedvelge «Hizb ut-Tahrir» işi boyunca yaqalanğan Aqyarlı dört kişi kirsetildi, 2016 senesi sentâbr ayında olarğa qarşı qarar çıqarıldı. Böyleliknen, Yuriy Primov 4893 nomeri, Ferat Sayfullayev 5176 nomeri boyunca qayd etilgen, Ruslan Zeytullayevniñ işini ise, mahkeme yañıdan baqılmasına yolladı, amma bu qarar rusiyeli maliye nezareti hızmetine onı cedvelge 2608 nomeri ile kirsetmege keder etmedi. Rustem Vaitov ise, belli olmağan sebeplerden bu cedvelge kirsetilmedi.

İşbu cedvelge kirsetilgen insanlarğa maliye ameliyatlarını yapmaq yasaqtır.

Avdetniñ bildirgenine köre, Rusiye maliye nezareti hızmetiniñ terrorist ve ekstremistler cedveline nevbetteki Qırım sakinleri de kirsetildi: Anna Andriyevskaya, İlmi Umerov, Nikolay Semena, Andrey Klimenko ve digerler.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız