Aqmescit (Simferopol) merkeziniñ tamir etilmesinen oğraşqan şirket, vazifelerini yaramay becergeni tasdıqlansa, «qara cedvelge» kirsetile bile.
Bu aqta Aqmescit memuriyeti yolbaşçısı Gennadiy Baharev bildirdi.
«Olarnıñ yapqan işine mesüliyetsiz davranğanı körüngen fotoresimler ve video kene de peyda oldı. Bellesem, bu böyle ise, işbu şirket qara cedvelge kirsetilecek. Amma istemez edik, çünki yahşı iş yapıla. Umumen olaraq aytsaq, şeer merkezi raatlanmaq içün çoq istep saylanılğan bir yer oldı», – dep qayd etti memur.
Onıñ sözlerine köre, Aqmescit merkeziniñ tamir etilüvi mart soñunda şeer memuriyetiniñ qattı nezareti astında yekünlenecek.
Bunen beraber Baharev qayd etti ki, bütün işler şirketniñ parasına yapıla, dep bildire «Krıminform».
Avdetniñ evel bildirgenine köre, bazı yerlerde yañıdan qoyulğan qaldırım taşçıqları kene de bozuldı. Şeer sakinleriniñ fikrince, bunıñ sebebi, işler buzlağan topraqta yapılğanı oldı.
İçtimaiy ağlar qullanıcıları ayta ki, bundan evel Karl Marks ve Puşkin soqaqlarınıñ körünişi daa güzel edi, böyle tamirge ise diversiya dep aytalar.
Avdetniñ evel bildirgenine köre, Aqmescit merkezinde işçiler qaldırım taşçıqlarını ava arareti -10 dereceni teşkil etkende qoya edi. İşler, qarantlıq tüşken soñ da devam etken edi.
Bundan da ğayrı, Qırım blogeri Aleksandr Gorniy «Eho Moskvı» saytında «Diversantlar Aqmescit merkezine sürip kirdi» serlevalı fotoreportajnı paylaşıp, Aqmescit merkezindeki tamirni diversiya dep adlandırdı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
