Ermeni Bazar (Armânsk) şeer mahkemesi Qırımda yaqalanğan Seit-İbraim Zaytullayevni 5 biñ ruble para cöremesinen cezaladı ve yaqalavdan azat etti.
Bu aqta Qırım uquq qoruyıcı gruppası bildire.
Bundan evel Federal havfsızlıq hızmeti (FSB) idaresinde bildirdiler ki, 1997 senesi doğğan Ukraina vatandaşı Seit-İbraim Zaytullayev Qırım ile sıñırnı, keçirüv noqtasından keçmeyip, Herson vilâyeti tarafından keçmege tırıştı. Sorğu neticesinde belli oldı ki, o, bir yıldan ziyade Noman Çelebicihan adına göñülliler batalyonınıñ terkibine kire edi.
«Mahkemeci Tatyana Fedeneyeva Qırım sakininiñ Rusiye Cinaiy kodeksiniñ 322-ci maddesi 1-ci qısmı (Rusiye Federatsiyası Devlet sıñırını qanunsız keçüv) boyunca qabaatlı olğanını tanıdı ve onı 5 biñ ruble para cöremesinen cezaladı. Zaytullayev mahkeme zalında yaqalavdan azat etildi, çünki mahkemeci bundan evel belgilengen cezanı devam ettirmedi», – dep aytıla beyanatta.
İçtimaiy ağlarda Facebook, Vkontakte, Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
