Qırımtatar faali İlmi Umerov Rusiye Taqiqat komitetiniñ Qırım boyunca Taqiqat idaresinde rusiyeli adliyeci Nikolay Polozovnıñ davası boyunca sorğuğa çekildi.
Bu aqta Umerov mart 15-te Facebook saifesinde bildirdi.
Taqiqatçı adliye saasında yardım aluv meselesinen meraqlana edi.
«Taqiqatçı bu meselenen meraqlandı: Polozov maña uquq ve adliye saalarında yardım ettimi, ve elimizde bu yardım kösterüvi aqqında añlaşma barmı… Men añlattım ki, añlaşma 2016 senesi iyün ayında imzalandı. Bunen beraber, Nikolay maña adliye saasında yardım etken bir qaç seferni añlattım», – dep yazdı Umerov.
Avdetniñ evel bildirgenine köre, Qırımda adliyeci Nikolay Polozovğa nisbeten dekabr 20-de cinaiy iş devam ettirildi. Uquq qoruyıcılarnıñ fikrince, Qırımda uquq qoruyıcı nizamınıñ böyle areketleriniñ esas maqsadı, Polozovnı «Umerovnıñ işinde» imaye etüvden uzaqlaştırmaqtır.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
