Avropa deputatları Qırımnı ziyaret etkenleri içün sanktsiyalardan qorqmay

21.03.201710:31

Qırımğa kelgen Avropa siyasetçileri Ukraina tarafından kirsetile bilecek sanktsiyalardan qorqmay.

Bu aqta Qırım parlamenti azalarınıñ Avropa siyasetçileri ile körüşüvinde Sırbistan Halq skupşinası (Sırbistan radikal firqası) deputatı Milovan Boiç bildirdi.

«Qayd etmeli ki, bizim içün, Sırbistan deputatları olaraq, bugün siziñ yanıñızda bulunmamız büyük şereftir, ve qayd etemiz ki, Ukraina bizge nisbeten kirsete bilecek iç sanktsiyalardan qorqmaymız», – dep ayttı o.

Mart 20-de Qırım parlamentinde Devlet Şurası reisiniñ muavini Remzi İlyasov ve prezidium azalarınıñ Sırbistan, Çernogoriya, Büyük Britaniya ve Çehiyadan kelgen Avropa siyasetçileri ile körüşüvi keçirildi. Olarnıñ arasında Sırbistan radikal firqasından Sırbistan Halq skupşinası (parlament) deputatları Milovan Boiç ve Dubravko Boiç, Çehiya Cumhuriyeti parlamentiniñ deputatalar palatası azası Yaroslav Golik, Sırbistan radikal firqası prezidiumınıñ azası Aleksandr Şeşel, Mustaqillik firqası (Büyük Britaniya) azası Riçard Vud, Birleşken qırallıqnıñ Enfild ve Haringi rayonında Mustaqillik firqası bölüginiñ reisi Naycel Sussman oldılar. Bundan da ğayrı, körüşüvde Qırğızistan ve Braziliya temsilcileri de bulundı. Ukrain siyasetçileri merasimde olmadı, dep bildire «AN-Krım».

Avdetniñ evel bildirgenine köre, deputatlar taqımı yarımadada mart 19-21 künleri bulunacaq. Qayd etile ki, ziyaret Qırım baari vaqialarınıñ üç yıllığına bağışlanğan.

Foto: RİA Novosti Krım. Aleksandr Polegenko

İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası