Qırım sakinleriniñ de Avropağa vizasız barmağa imkânı olur

20.04.201716:10

Ukraina vatandaşları olğan Qırım sakinleriniñ de Avropağa vizasız barmağa imkânı olur. Bunıñ yekâne şartı şu ki, ukrain ükümeti organları tarafından berilgen biometrik pasport olması kerek.

Bu aqta Avropa Birligi tışqı siyaset hızmetiniñ spikeri Mayya Kosyançiç bildirdi.

Ukraina Devlet sıñır hızmetiniñ haber etkenine köre, Qırım sakinleri içün sıñırlavlar kirsetilmeycek. Lâkin, «işbirlikçilerni» («kollaboratsionistlerni») közetecekler, dep söz bereler.

«Sıñır tışına çıqmaq içün qanun boyunca vesiqalarnı alğan Qrım sakinleri, Ukrainanıñ diger vatandaşları kibi, umumiy qaideler boyunca yürecek», – dep ilân etti Ukraina Devlet sıñır hızmeti yolbaşçısınıñ yardımcısı Oleg Slobodân.

Avdetniñ evel bildirgenine köre, aprel 6-da, Avropa parlamenti deputatları Strasburgda keçirilgen umumiy toplaşuvda Ukraina vatandaşlarına qısqa müddetke Avropa birligi devletlerine vizasız kiriş aqqını bergen qanun leyhası içün rey berdi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası