SİZO-da bulunğan Arsen Cepparovnı tibbiy hadimler niayet baqtı

03.05.201716:18

«Hizb ut-Tahrir» işi boyunca yaqalanğan Arsen Cepparovnı Aqmescit SİZO-sınıñ tibbiy hadimleri niayet baqtı.

Bu aqta onıñ adliyecisi Cemil Temişev bildirdi.

Onıñ sözlerine köre, Cepparovda peyda olğan şişikni yoq etmege tırışa, oña antibiotikler yazıp berdi, ama şimdilik diagnoznı belgilemedi. Kerek olsa, onı ameliyatqa alıp ketecekler.

Bundan evel Temişev haber etti ki, «Hizb ut-Tahrir» işi boyunca Yaltada yaqalanğan ve şimdiki vaqıtta Aqmescit SİZO-sında bulunğan Arsen Cepparov acele ameliyatqa muhtac. SİZO memuriyeti oña kerekli tibbiy yardım etilmesini red etken edi. Adliyeci SİZO memuriyetine qarşı prokuraturağa şikâyet etmege, bunen beraber, Cepparovğa tibbiy yardım etilmesini red etüvge qarşı mahkemege muracaat etmege planlaştırğan edi. Amma bunı yapmadı, çünki bugün Cepparovnı tibbiy hadimler baqtı ve tedaviylemege başladı, dep bildire «Qırım.Aqiqat».

Arsenniñ bedeninde daima şişikler peyda ola. Cepparovnıñ yaqınları ayta ki, ondan irin çıqa.

Bundan evel Cemil Temişev SİZO idaresinden Cepparovğa ameliyat keçirmekni talap etip, bunı yaptırdı.

«Simdi er şey tekrarlana. Arsenniñ yañı şişigi peyda oldı, bunıñ içün bir qulağı eşitmey ve o, daimiy baş ağrısından azap çeke. Qulağından irin çıqa», – dep yazdı mühbir Taras İbragimov Facebook saifesinde.

«Hizb ut-Tahrir» işi boyunca Yaltadaki Qızıltaş (Krasnokamenka) köyünde yaqalanğan Arsen Cepparov ve Refat Alimov apiste 2016 senesi aprel 18-den başlap buluna.

Rusiye Yuqarı mahkemesi «Hizb ut-Tahrir» teşkilâtını yasaq etti ve «terroristik» tanılğan 15 birleşme cedveline kirsetti.

İçtimaiy ağlarda Facebook,Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası