Qarasuvbazarda Bekir Çoban-zade adına mükâfatnıñ laureatları belgilendi

13.05.201713:35

Mayıs 6-da Qarasuvbazarda (Belogorsk) Bekir Çoban-zade adına Halqara mükâfatnen taqdirlenüv boyunca jüri toplaşuvı keçirildi. Jüri azaları ve hayriye fondu tesisçisiniñ mesleatçıları yarışta iştirak etken işlerni muzakere etti. Rey berüv neticesinde 2016-2017 ss. laureatları belgilendi.

Bu aqta Gasprinskiy adına qırımtatar kitaphanesiniñ matbuat hızmeti bildire.

«Qırımtatar edebiyatşınaslığı, folklorşınaslığı, bunen beraber, edebiyat ve tenqit işleri saasında eñ yahşı araştırma içün» namzetliginde Refat Abdujemilev «Mehmed Senainiñ hronikası XVII asır qırımtatar bediiy edebiyatınıñ yadikârlığı olaraq» monografiyası içün ğalebe qazandı.

Mihaylo Yakuboviçniñ «Qırım hanlığınıñ felsefiy mefküresi» monografiyası «Qırımtatar halqınıñ tarihı, etnografiyası ve sanatı, bunen beraber, entsiklopediya ve kitabiyatnen bağlı iş saasında eñ yahşı araştırma» namzetliginde ğalebe qazandı.

Jüriniñ qararına binaen, yarışta iştirak etken bir qaç iş Bekir Çoban-zade adına Hayriye fondunıñ fahriy yarlıqlarınen taqdirlenecek. Bu, «Kefe lâlesi» şiir cıyıntığı, «Qırımtatar tilinen bağlı leksikografik çalışmalarnıñ tarihçesi (1292-1916 ss.)» monografiyası, «Bağçasaray kollektsiyası» neşirleriniñ bir qaç tanesi, «Qırımtatarlarnıñ tarihı, mimarcılığı ve medeniyeti abideleriniñ cedveli. I-ci tom», «Kırım’daki Kırım Tatar (Türk-İslâm) Mimarȋ Yadigârları».

Bekir Çoban-zade adına Halqara mükâfatnen taqdirlenüv merasimi 2017 senesi mayıs 27-de Qarasuvbazarda keçirilecek.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

бекир чобан-заде

бекир чбан-заде