Rusiye Yazıcılar birligi Qırım bölügi idaresiniñ reis muavini Oleg Azaryev qırımtatarlarnıñ 1944 senesi sürgünligini aqlay.
O, Facebook saifesinde «Ne içün Stalin tatarlarnı Qırımdan sürgün etti» adlı maqaleni paylaştı, o maqale tübünde munaqaşalar peyda oldı. Bu munaqaşalarda Azaryev faal iştirak etip, aytqan laflarından utanmadı.
«Stalin başqaca yapabile edi. Vagonlarğa degil de, 1921 senesi zabit ve ziyalılarnı kibi, barjalarğa oturtıp, yalıdan uzaq bir yerge alıp ketip, suvğa boğabile edi… Sizni ise, sıcaq ülkelerge dindaşlarıñızğa yolladılar… Elbet, er kesni yollamaq kerekmey edi, saylamaq kerek edi – hain ve işbirlikçilerni saylap, sürgünlikke yollamaq degil de, atıp öldürmek kerek edi, buña razım. Amma hainlik pek kütleviy edi», – dep ayta yazıcı.
Bu muzakerelerge daa bir qaç başqa qullanıcı qoşuldı, izaat müellifine aynı qaderni tilegenler ise, şu an milletlerara munasebetlerni bozğanlarında qabaatlandı.
Qayd etmek kerek ki, Azaryevniñ diger vazifeleri arasında onıñ «Krımskaya pravda» gazetasınıñ mühbiri olğanı bildirile, qaysı biri qırımtatarlarğa qarşı noqta-i nazarınen belli.
Avdetniñ evel bildirgenine köre, Aqmescit rayonındaki Aqtaçı Qıyat (Beloglinka) ve Saraylı Qıyat (Mirnoye) köyleriniñ kirişinde tarihiy adlar ile işaretlerni qoymağa teklif etken ve bu qararğa qol tutqan deputatlarnı Qara deñizge batırmağa çağırdılar. O vaqıt içtimaiy ağdaki muzakerelerde qırımtatar deputatlarını deñizge batırmağa teklif etken «Yedinaya Rossiya» firqasınıñ azası ve Saraylı Qıyat köyü mektebiniñ ocası Natalya Krıjkonıñ böyle beyanatlarına Aqmescit memuriyeti yolbaşçısınıñ muavini Ruslan Yaqubov cevap berdi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
