Bu mevsimde ara-sıra olğan şiddetli yağanaqlar Aqmescitni (Simferopol) Venedikke çevirdi. Bundan da ğayrı, mayıs 22-de Qırım paytahtında çoq burçaq yağdı.
Çoq yağğan burçaq topraqnı beyaz etti. Bazı yerlerde, yerli sakinlerniñ aytqanlarına köre, burçaq seviyesi tobuqqa qadar yetken.
Şiddetli sağanaq neticesinde Aqmescit merkezi büyük tıqanıqlıqqa çevirildi. Avtomobil aydayıcıları pek yavaş yüre edi, çünki suv tübünde qalğan yol çuqurlarına tüşmege qorqa edi.
Qazalarnıñ daa çoq yüz bergeni qayd etildi. Bundan da ğayrı, Salğır özeninde suv seviyesi köterildi. Aqmescit soqaqlarından suvnen yuvunğan çöplük özende toplana.
Tahminlerge köre, böyle yağmurlı ava Qırımda iş aftasınıñ soñuna qadar devam etecek.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
