«Çiygoznıñ işi» boyunca Qırım mahkemesiniñ toplaşuvında Konstantinov, Kovitidi ve Tsekovnıñ sorğuğa çekilmesi red etildi

08.06.201722:10

İyün 8-de Qırım Yuqarı mahkemesi qırımtatar faali Ahtem Çiygoznıñ işi boyunca toplaşuvda imaye tarafınıñ üç Qırım memurını – yarımada parlamentiniñ spikeri Vladimir Konstantinov ve Qırımdan rusiyeli senatorlar Olga Kovitidi ve Sergey Tsekovnı sorğuğa çekmek muracaatını red etti.

Bu aqta Çiygoznıñ adliyecisi Nikolay Polozov Facebook saifesinde bildirdi.

Onıñ sözlerine köre, mahkeme Konstantinovnı, onıñ yazma razılığı olmadan, çağırmaqnı red etti. Kovitidi ve Tsekovnen bağlı vaziyette ise, mahkemeciler ayttı ki, «berilgen şefaat arizasınıñ kerekligi yeterli qadar añlatılmadı».

Avdetniñ evel bildirgenine köre, Ahtem Çiygoz Aqmescit SİZO-sında 2015 senesi yanvar ayından başlap buluna, o, Rusiye Federatsiyası Cinaiy kodeksiniñ 212 maddesi 1-ci qısmı («kütleviy nizamsızlıqnı teşkil etüv») boyunca qabaatlana, madde boyunca qabaatlanğan kişi 10 yılğa qadar apiske qapatıla bile.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası