Bor Çoqraq (Fontanı) qasabasında yerleşken mektep Aqmescit (Simferopol) mülkiyetine keçecek. Devlet Şurasınıñ alâqalı qanun leyhası qabul etilmezden evel mektep cumhuriyet mülkiyetine ait.
Qırım mülk ve topraq munasebetleri naziriniñ muavini Oksana Lahinanıñ sözlerine köre, mektepniñ umumiy mesafesi 9 biñ 42,2 kvadrat metrden ibaret, bina azır, amma onıñ tolusınen işke tüşürilmesi içün mektepniñ belediyege teslim etilmesi kerek.
Bor Çoqraq qasabasında çoq yıl devamında qurulğan mektep 2016 senesi dekabr 29-da tantanalı şekilde açıldı. Mektepte 825 talebe oquycaq, bu yerde 33 sınıf olacaq. Oquv yurtuna belli qırımtatar qaramanı, istihbaratçı (razvedkacı), Rusiye qaramanı Alime Abdennanovanıñ adı berildi. 44 sanlı mektepniñ müdiri vazifesine Akimova Eleonora Şevketovna tayinlendi. Onıñ ocalıq tecribesi 30 yıldan ziyadedir. Eleonora Akimova qorantasınen beraber 2003 senesi Qırım paytahtına köçip keldi. Bir yıl keçken soñ 40 sanlı mektepte muzıka ocası olıp çalışmağa başladı, bundan soñ oquv-terbiye işi boyunca müdir muavini oldı. Vatanğa qaytmazdan evel Eleonora Akimova 20 yıl devamında Özbekistanda muzıka mektebinde çalıştı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
Foto: Avdet
