Bugün Qırım mahkemesinde ilk sefer Ahtem Çiygoz sorğuğa çekilecek

25.07.20179:50

Salı künü, iyül 25-te, Qırım Yuqarı mahkemesinde qırımtatar faali Ahtem Çiygoz sorğuğa çekilecek, o, 2014 senesi fevral 26-da mitingde iştirak etkeni ve onı teşkil etkeninen qabaatlana.

Bu aqta adliyeci Nikolay Polozov bildirdi.

«İyül 25-te Ahtem Çiygoz sorğuğa çekilecek. O, dava devam etken bütün vaqıt içinde daa izaat bermegen edi. Ve mahkemeden aldın taqiqat keçirilgende de o, izaat bermegen edi. Taktik fikirlerimizge köre, biz qabaatlav ve imaye taraflarınıñ elinde olğan bütün delillerni baqıp çıqmağa ve bundan soñ Çiygoznıñ sorğuğa çekilmesi aqqında ilân etmege isteymiz», – dep añlattı Polozov «Qırım.Aqiqat»qa bergen intervyusında.

Avdetniñ evel bildirgenine köre, Ahtem Çiygoz Aqmescit SİZO-sında 2015 senesi yanvar ayından başlap buluna, o, Rusiye Federatsiyası Cinaiy kodeksiniñ 212 maddesi 1-ci qısmı («kütleviy nizamsızlıqnı teşkil etüv») boyunca qabaatlana, madde boyunca qabaatlanğan kişi 10 yılğa qadar apiske qapatıla bile.

İçtimaiy ağlarda Facebook, VkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.