Qırımda qırımtatar faali Server Karametovnı imaye etmek içün imza ve hasiyetnamelerni toplaylar. Onı on künge memuriy apiske aldılar.
Bu aqta 10 avgust künü advokat Emil Kurbedinov ikâye etti.
Onıñ sözlerine köre, bütün toplanğan malümatlarnı apis etilgen faal boyunca appelyatsion şikâyeti baqılğanda berecekler.
«Appelyatsıya yigirmi dört saat içinde baqılmaq kerek. Bugün saat 12-de biz onı berdik, yarın saat 12-de onı baqmaq kerekler», – bildirdi advokat.
Hatırlatamız, qart qırımtatar faaline qarşı eki memuriy protokol tizdiler. Olardan birisi – Rusiye Memuriy Qanun bozuvlar aqqında Kodeksniñ 20.2 maqalesi boyunca «bir insan keçirgen piketlerniñ tertibini bozğanı içün», ekincisi – «Polis hadiminiñ qanuniy emirine boysunmaması» içün makeme Karametovğa 10 biñ ruble para cezasını berdi.
Server Karametov 76 yaşında, onıñ Parkinson hastalığı bar. 8 avgust künü mahkeme oturışınıñ vaqıtında Karametov yaramay oldı, oña «acele yardımnı» çağırttılar.
Avdet haber etkenine köre, Aqmescitte polis Qırımnıñ Yuqarı mahkeme binası altına öz başına piketke çıqqan qırımtatar milliy areket veteranını Server Karametovnı yaqaladı.
Hatırlatamız, bu seneniñ 18 mayıs künü Server Karametov Aqmescitniñ merkez meydanında tek bir özü piketke çıqtı. O vaqıtta da polis onı yaqalap, ondan yasaq etilgen areket yapqanı içün iza etüvni alğan edi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
