Bağçasaray rayonınıñ sakinine içtimaiy ağlardaki yazıları içün 300 biñ para cezasını berdiler. Böyle qararnı Qırım mahkemesi iyül ayında çıqardı, amma bu aqta tek bu künlerde belli oldı.
Bu aqta öz Facebook saifesinde qırımtatrlarnıñ milliy areket faali Nariman Celâl haber etti.
Onıñ sözlerine köre, Zaremanıñ ailesi öz belâsı aqqında halq ögüne çıqıp, añlatmadı.
«Biz, milliy areket iştirakçileri, oña uquqiy yardım etip, Rusiye Federatsıyası Cinaiy Kodeksiniñ 282.1 maqalesi boyunca minimal ceza olması içün areket ettik. Bağçasaray rayonınıñ yerli faalleri oña yardım içün 50 biñ ruble topladılar. Amma ceza parası büyük, ailesiniñ imkânları ise yeterli degildir», – haber etti Celâl.
Milliy areket faalleri «Qırım marafonı» teşkilâtçılarına ve episi lâqayd qalmağa istemegen insanlarğa Zaremanıñ ailesine yardım etmege muracaatında bulunalar.
Hatırlatamız, Qırımda «Krımskaya solidarnost» («Qırım birdemligi») topluluğı yarımadadaki qırımtatarlarınıñ evlerinde tintüvler yapılğanda yanlarında bulunğan ve bu sebepten olarğa para cezaları berilgen vatandaş faallerine qol tutmaq içün «Qırım marafonı» adlı para toplamaqnı ilân etti. Faaller «lâqayt olmağan insanlarnıñ birligini» köstermek içün aqçalarnı kâğıt parasına deñiştirmeyip, 10 ruble ile toplamaqnı teklif eteler.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
