Nasıl etip eki afta içinde radio açmaq mümkün?

05.09.201712:41

Endi meni böyle tecribem de bar. Bu aqta treningler ve lektsiyalar keçire bilem.

Daa bir ay evelsi, men ayat dalğalarında tenbel – tenbel sallanıp, Qırımda, istidatlı insanlarımız içün böyle bir muzıkalı – medeniyetli meydançıq açılsa yahşı olur edi, dep tüşüne edim. Bu radio zemaneviy, irişilir ve mobil olmaq kerek. Amma, doğrusunı aytsam, ne ve nasıl yapacağımnı bilmey edim. Men tek arzu ete edim.

Böyle fikirlerniñ yanında, adet üzre, nevbetteki metin bulunmaq kerek: «Sayğılı dostlar! Sizlerge, üstünde çoq ve ilhamlı çalışılğan, yañı radiomıznı taqdim etmege pek memnünmiz. Mına böyle etip, radiomıznı taqdim etemiz, açılış sebebinden şertçigimiz ve fotosını kösteremiz ve alğışlar, dostlar».

Öyle bir şey olmaycaq. Şimdilik. Amma endi, şeñ ve muzıkalı taqdimge azırlanıñız.

Soñ eki aftam pek yoğun keçti. Men bu aftalarnı «er şeyni yetiştirmek ve aqıldan taymamaq» fikirinen yaşadım. Fikirlerimizge bir temel yazdıq ve işimizge başladıq. Logotip, sayt, tehnikiy donatmalar, muzıka taqıştırması, birinci pleylistler kibi, meseleleri üzerinde çalıştıq. Menim yanıma bir çoq insan toplandı. Bu tanış – bilişler, dostlar, yañı adamlar, olarnıñ qoltutuvları ve yardımları olmasa edi, bir şey yapıp olamaz edik. Meni abstrakt «men Böyle körem» ibareme, olar eñ yahşı tehnikiy çezüvler tapa bildiler. Ve böyleliknen men er şeyni yetiştirdim, Ermitajğa, toyğa, film çekimlerine bardım, Qurban bayram ve birinci çañ bayramlarını qayd ettim.

Bügün ise, biz sizlerge yañı onlayn radionı taqdim etemiz, onıñ adı CANLI Radio.

CANLI – sözüne çoq manalar qoyılğandır.

Bu 1.0 bizim saytımıznıñ versiyasıdır. 1.0 – bu nedir? Bu raqamlar, tek bizim radio saytımız ilerleycek ve keñişleycek manalarına keledir. Biz yañı kontent tizecekmiz.

Saytımızda neler bar? Saytnıñ yuqarı qısmında, pleyerni köresiñiz, oña basasıñız ve qırımtatar muzıkasını diñleysiñiz. Türküler ve muzıkanı saylaymız ve sizlerni taacipşendirmege azırmız.

Saytnıñ aşağı qısmında muzıka yañılıqları ve maqalelerni tapa bilesiñiz. Ssılkalarğa basa – basa arhivge keçe bilesiñiz. Arhivde özüñizniñ sevgen ve begengen muzıkañıznı istegen vaqtıñızda diñley bilesiñiz. Biz çoq deñeycemiz. Er vaqıt yañı – yañı şeyler uyduracaqmız. Sizlernen em canlı, em de internet ağlarından laqırdı etecekmiz. Biz em teraqqiy, em de konservativ olacaqmız. Biz sizlernen beraber em ana tilimizni, medeniyetimizni ve muzıkamıznı saqlap qalınması ğzerinde qayğıramız.

BİZ CANLIMIZ!

Bizim saytımızğa, mından keçe bilesiñiz – http://canli.online/

Facebookta – https://www.facebook.com/canliradioqirim/

İnsagramda – https://www.instagram.com/canli_radio/?hl=uk

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

 

 

 

 

 

Author: Редакция Avdet

Avdet gazetası