İlim, bilgi ve üner aqqında atalar sözleri

10.06.202112:00

İlim – aqıl çoqrağıdır.

İlim qazanmaq – taş kemirmek demektir.

Aqıl – yarı baylıq.

Zenaat – altın bilezliktir.

Baba üneri balağa miras.

Oqumaqnıñ ertesi – keçi yoq.

Bilmemek ayıp degil,

Ögrenmemek ayıptır.

Altın yerde qalsa da, bilgi yerde qalmaz.

Anadan körgen – ton biçer,

Babadan körgen – oq atar.

Alim olmaq qıyın degil,

Adam olmaq qıyın.

Ögrenmek qolay, ögretmek qıyın.

Kitap – bilgi anahtarı.

Oqumaq-yazmaq – inenen quyu qazmaq.

Bilegi küçlü birni yıqar,

Bilgisi küçlü biñni yıqar.

Sen ögrenmeseñ zaman özü ögretir.

İlim qazanı aç qalmaz.

Bilmegeniñni soramaq ayıp degil.

Cailge söz añlatmaq –

Devege endek atlatmaqtan zordır.

Baba ünerini taşlama.

Yigitke qırq üner de azdır.

Ünerli qolda bereket bar.

Eñ yahşı dost – kitaptır,

Eñ yahşı zenginlik – bilgidir.

Ögrenmek içün yaşa, yaşamaq içün ögren.

Oquvsız bilgi yoq,

Bilgisiz künüñ yoq.

Çeber qoldan suv içmek de fayda.

Üneri bar aç qalmaz.

Çoq körgen çoq bilir.

Caillik – can azabıdır.

Sen oqumasañ, zaman seni oqutır.

Bilgen bilgenini işler,

Bilmegen parmağını tişler.

Bilgen bilgisine işanır,

Bilmegen nege işanır?

Zenaatı yoq kişiniñ,

Lezeti yoq işiniñ.

Caillik – faqırlıqtan beterdir.

Tikensiz gül olmaz, meşaqqatsız – zenaat.

Zenaat – insannıñ baylığı.

Zenaatsız adam – meyvasız terektir.

Ünersizge dünya tar.

Bilgeniñni söyle, bilmegeniñni diñle.

Ocağa, ana-babaña etkeniñ kibi ürmet et.

Qalem – qılıçtan keskindir.

Oquvnıñ soñuna çıqmağan cailden beter.

Çeber elinden belli olur, oqumış – tilinden.

Eñ yahşı güzellik – edep ve bilgi güzelligidir.

Ünerniñ artığı yoq.

Ünerliniñ qolu altın.

Çoq işlegen usta degil de,

İşniñ usulını bilgen ustadır.

Mektep körmek – insan içün devlettir.

Ustadan da usta bar.

Üner erniñ qanatı.

Yapqan usta degil, yaptırğan ustadır.

Dünyada eñ qıyın şey – añlamağanğa añlatmaqtır.

Author: Редакция Avdet

Avdet gazetası