Bağçasarayda İsmail Gasprinskiy aqqında bir vesiqalı film taqdim etildi

06.07.202112:39

Ulu qırımtatar ve umumtürkiy maarifçisi İsmail Gasprinskiyniñ 170-inci yıllığına Qaradeniz Production studiyası “Terciman” serlevalı bir vesiqalı film çekti.

Video-çalışmanı, maarifçi ve yazıcınıñ uzun yıllar devamında faal olaraq çalışqan ve filmniñ esas çekilişlerniñ yapılğan Bağçasarayda taqdim etildi.
“Terciman”, Gasprinskiyniñ fikirlerini ve ümütlerini, ileriletici ğayeleriniñ ve bularnıñ kerçekleşmesi içün aşmaq kerek olğan manialarnıñ  bir aksi oldı.

Gasprinskiy aqqında film – genç taqım içün bir türlü debüttir. Böylece, rejissör-sanalaştırıcı, şimdilik qırım seyircisine az belli olğan Edem Asanov, stsenariy müellifi ise – Aziz Eskiyurtlı oldı. Filimde, ressam-sanalaştırıcı olaraq genç qırım kollektsioneri ve tetqiqatçısı Abdül Vahab Seythalilov iştirak etti. Genç İsmail Gasprinskiyniñ obrazında Elvis Çolpuh bulundı. Elbette ki, seyirciler tarafından sevilgen insanlar da iştirak etti: film alıp barıcısı jurnalist Lenur Yunusov oldı, metin diktor Eldar Kurtseitovnıñ sesinen oqundı.

Film çekilişleri bir qaç ay devamında yapıldı. Bu film daiy maarifçiniñ bütün ayat devirlerini qavray, resim yaratıcıları onıñ zengin iç alemini, qırımtatar halqınıñ kelecegi hayalını bildirmek istediler, dep Crimeantatars.club haber ete.

Author: Редакция Avdet

Avdet gazetası