Aqmescit (Simferopol) rayonınıñ Saraylı Kıyat (Mirnoye) köyünde 1100 oquv yeri olacaq mektep qurulması planlaştırıla.
Devlet satın almalar portalında olğan malümatqa köre, mektepni Jigulina roşça mikrorayonında 20 dekabr 2019 senesine qurıp bitirecekler. Kontrakta 572, 1 million ruble fiyatı kösterilgendir, bu paralar federal ve cumhuriyet bücetlerinden ayırılğandır.
«Bina üç qatlı olacaq. Sport içün ayrı eki qatlı bina qurulacaq. Başlanğıç mektep içün oquv odaları a ayrı blokqa kirsetilgendir. Sınıflarda 25 talebe olacaq. Paraleller – 4 dane, sınıf sayısı – 44 dane olacaq», dep qayd etilgen tehnik vesiqalarda.
Oquv binanıñ territoriyasında kötelnıy binası, transformator, dizel elektrik stantsiyası, futbol meydanı, 100 ve 250 metrlik çapuv yolaqları, basketbol ve valeybol meydanları, gimnastik aletleri olğan meydançıq, balalar ve çeşit tedbirler keçirmek içün meydançıqlar olacaq.
Ondanda başka, mektep etrafında eki metr yüksekliginde olğan isar da qoyulacaq.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
