Avgustnıñ 26-nda, cuma künü, Kiyev, Melitopol, Varşava şeerlerinde qırımtatar siyasiy mabüslerine qoltutuv aktsiyaları ötkerildi.
Kiyevniñ Mustaqillik meydanında, aynı zamanda ruhiy hastalar dispanserinde bulunğan Meclis reisiniñ muavini İlmi Ümerov ve diger siyasiy mabüslerge bağışlanğan birdemlik aktsiyası ötkerildi.
Bundan da ğayrı bugün Rusiyeniñ Varşavadaki elçihanesi ögünde İlmi Ümerovnıñ menfaatlarını qorçalav aktsiyası keçti.
Zaporojye vilâyetiniñ Melitopol şeerinde qırımlı siyasiy mabüslerge bağışlanğan birdemlik aktsiyası ötkerildi. Tedbirde «İlmi Ümerovnı azat etiñiz!», «Erviñ qayda?», «Qırım mabüslerine azatlıq», «Bizim yetekçiler – terrorist degil» kibi şiarlar köterildi.
Bu aqta özüniñ Facebook saifesinde Gülnara Bekirova bildirdi.