Bugün, oktâbr 24-te Bağçasaray rayon mahkemesinde Meclis Kâtibiyeti yolbaşçısı Dilâver Akiyevniñ memuriy işi boyunca toplaşuvnıñ keçirilmesi planlaştırılğan. Bundan evel o, mahkemede qırımtatar tilinde muzakere etmege istegeni aqqında bildirdi.
Bu aqta Qırımtatar Qurultayı Merkeziy saylav komissiyasınıñ reisi Zair Smedlâyev haber etti.
Onıñ fikrince, mahkeme toplaşuvını nasıldır yaramay şeylernen bozmağa tırışacaqtırlar.
Bunen beraber, bugün Qırımtatar Milliy Meclisi yolbaşçısınıñ muavini Ahtem Çiygoznıñ işi boyunca nevbetteki toplaşuv keçirilecek.
Avdetniñ bundan evel bildirgenine köre, qırımtatar faalleri İlmi Umerov, Şevket Kaybulla, Sadıh Tabah, Ali Hamzin, Enver Kurtiyev, Bekir Mamutov, Emine Avamileva, Mustafa Mauşev Qırımtatar Milliy Meclisi (Rusiye Federatsiyasında ekstremistik teşkilât olaraq tanılğan) toplaşuvında iştirak etkenleri içün para cöremesinen cezalandı.
İlmi Umerov ve Bekir Mamutov olarğa qarşı çıqarılğan mahkeme qararlarına şikâyet etmege niyetlene.
2016 senesi aprel 26-da Qırım Yuqarı mahkemesi Qırımtatar Milliy Meclisiniñ ekstremistik teşkilât olğanını tanıdı ve Rusiyede onıñ faaliyetini yasaq etti. Sentâbr 29-da Rusiye Yuqarı mahkemesi Meclisniñ yasaq etilmesi aqqında Qırım Yuqarı mahkemesiniñ qararını tasdıqladı.
