Amnesty International halqara uquq qoruyıcı teşkilâtınıñ er sene azırlağan maruzasında qırımtatar faali Ahtem Çiygoz «insaf mabusı» dep adlandırıldı.
«Ahtem Çiygoz – Qırım insaf mabuslarından biri ola. Ali Asanov ve Mustafa Degermenci de aynı 2014 senesi fevral 26-da yüz bergen «kütleviy nizamsızlıqta» iştirak etkenleri içün apiste buluna», – dep aytıla uquq qoruyıcılarnıñ beyanatında, dep bildire «Qırım.Aqiqat».
Ahtem Çiygoz Aqmescit SİZO-sında 2015 senesi yanvar ayından başlap buluna, o, Rusiye Federatsiyası Cinaiy kodeksiniñ 212 maddesi 1-ci qısmı («kütleviy nizamsızlıqnı teşkil etüv») boyunca qabaatlana, madde boyunca qabaatlanğan kişi 10 yılğa qadar apiske qapatıla bile.
Qırım İçki rayonınıñ Ferngeym (Urojaynoye) köyü sakini Ali Asanov 2015 senesi aprel 17-de yaqalandı. Belli ki, Ali Asanov, dört balanıñ babası ola, olarnıñ eñ kiçigi, babası SİZO-da bulunğan vaqıtta doğdı.
Mustafa Degermenci 2015 senesi mayıs 7-de yaqalandı.
Taqiqatnıñ noqta-i nazarına binaen, Ali Asanov ve Mustafa Degermenci 2014 senesi fevral 26-da Qırım parlamenti binası yanında keçirilgen miting neticesinde yüz bergen kütleviy nizamsızlıq istirakçileri oldı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
