Sonet 1 Artqaç söz aytqan, çoqça adaşır. Birden yañlışmaq iç de zor degildir. Zararnı körmez sükünet taşı, Laqırdı ise tek ziyan-zebildir. Qaç subetten soñ dertli yel ese, Kimlerge peşman daim bir yoldaştır. Şusı boş yerde oldı vesvese, Bunıñ tili tez, fikiri yavaştır. Söz deñizinde her bir lafnıñ ep Barğan yalısı bam-başqa bir yerdir: Birine neşe içün bir sebep, Digeri içün belâ ve kederdir. Çoq laf qaçırıp yañıla biñler. Zekiy az aytıp, her kesni diñler. 13.11.2021 *** Köz qapağıñnı kötermek içün, Kün kelir, qalmaz seniñ de küçüñ. Küsme ecelge, körünse tezden. Kim olıp kettiñ – sen bunı tüşüñ. 20.12.2021 *** Köy avası ep başqadır. Köy tınçlığı eñ üstün. Qalp bu yerde ilk taşqandı, Bu yerlerde men östüm. Aylañ — zaman tez eken: Dün daha adım-adımŞen göñülnen mektepke Şu yolçıqtan qatnadım. Yıl artından yıl ketti, Yol artından yol aştım. Qaç ülkege men yettim, Bir sürü yer dolaştım.Kene ev. Göñlüm taşqan: her şey bir — köre közüm.Bir tek şey endi başqa – Bam-başqayım men özüm. Kün keldi, ösken yerdem. Kün kelir ketmek içün. Böyle deñişmelerde Yoqtır kimseniñ suçu. Bardır bunıñ da hayrı. Yol nedir – bile taqdir: Qaç defa tüşer ayrı, Qaç kere keri kelir. Lâkin neticem açıq. Biliñ, her keske aytıñ: His etile yaqınlıq Anca ayrılğan sayın. Çoq kezdim, çoq dolaşqandım, Amma qayda yetmesem… Köy… ösken köy ep başqadır, Angi yanğa ketmesem. 6-8.02.2022 *** Eñ sevimli kitaplar ne içün farqlıdır? Dersiñ, olar em çeke, em sarıp alalar. Şu kitaplarnıñ tışı, içi meraqlıdır ve meraq dalğaları eksilmey, artalar. Olur, aynı parçanı kene de oqursıñ. Yañı heyecan, duyğu sarsıtır tenni. Belki de, qısqa zevqnı her daim qorursıñ. Her netice kösterir vaqıt ketkenni. Olur, başından kitap pek tatlı kelir. Tek acımasız zaman ketse ileri, tanış satırlar accı alâmet berir: kerek olur yeniden qaytmağa keri. Kimerde ihtiyac bar dünyadan uzaq qalmağa, baş-aqılnı dertlerden çekmek. Bilemiz, qayda mümkün özüni coymaq: qaramanlar, duyğular. Başqa ne kerek? Belli, her kesniñ ömrü– ayrı bir kitaptır: çeşit-türlü netice çıqmaq aşıqa. Elimizdeki kitap – kerçekke hitaptır. Sevgen kitapsız yaşav muhtac ışıqqa. 03.12.2020 *** Adım-adım yürü, maqsat qoy, yürü. Olsun yol sılaq, olsun quru, olsun qolay, olsun ağır. Köz ep qorqaq, el ep batır. İş başlansa, toqtatma işni, öz yüküni taşıy her kişi. Olsun küçük, olsun büyük, hep berilir küçke köre yük. Bir adım at, baq etrafqa. Yeter ki, toqtama, çoq baqma artqa. Eski doğrular, eski hatalar. Yaşav deñişmez yoldan qatalar. Körseñ hatanı, inañ ki, yeter. Onıñ ötesi – tek dert ve keder. Sen işiñe baq, toqtatma işni, öz yüküni taşıy her kişi. İş başlansa, bu işniñ yarısı. İsrar ğalipniñ ömürlik qarısı. Olsun doğru, olsun qıyış, iş başlansa, bu kene de iş. Yeter ki, toqtama. Toqtama, dostum! Ne olsa olsun – qısmettir. Olsun…
