Акъмесджит районынынъ Бий-Таныш (Первомайское) коюнинъ адий сакини, сабыкъ уста-чиленгир Энвер Ибраим огълу Джелялов бу дюньяны терк этти.
О, саде, алчакъгонъюлли, бильгили инсан, балалыгъында ачлыкъ, дженк, сюргюнлик, акъарет-ынджытувлар, осьмюр чагъындан агъыр эмек зорлугъыны корьген озь несилининъ типик ве дегерли векили эди.
Энвер агъа 1938 сенеси Акъ-Чокъракъ (шимди ёкъ – 1960-нджилернинъ башындан Багъчасарай теркибиндедир) догъды. Дешетли сюргюн йылы къорантасы Бухарагъа якъын Зиядин станциясына тюшти.
Буюген сонъ Энвер агъа Навои шеэринде, къоджаман азот истисалында чалышты, къоранта къурды, омюр аркъадашы Айше ханым иле учь эвлят осьтюрдилер. Оларгъа догъру миллий тербие бердилер.
Кендже ве онен бир азбарда яшагъан огълу Нариман Джелял V (2007) ве VI Къурултайда (2013) русие акимиети ясакъ эткен (2016) Меркезий Миллий къурум азасы, онынъ реисининъ муавини, 2015 сенеси исе бу къурум реисининъ биринджи муавини сайланылды.
2021 с. 4-сентябрьде оны, белли олгъаны киби, якъаладылар ве бугуньде о, фааллиги себебинден такъиплерге огърагъан сиясий мабюстир…
Окъумышлы, миллий ишлернен даима меракълангъан, Озьбекистанда да, Къырымда да джемаа фаалиетинден четте турмагъан Энвер агъа Джелялов вефат эткени мунасебетинен омюр аркъадашы Айше аптеге, къызы Лейля, огъуллары Руслан, Нариман ве оларнынъ къоранталарына, шу джумледен докъуз торунына, дигер якъынларына терен тазие бильдиремиз ве сабырлар, баш сагълыгъы тилеймиз.
Мерхум Алланынъ рахметинде, джаны дженнетте олсун.
Меркезий Миллий къурум азалары, Миллий арекет иштиракчилерининъ бир гурухы, Нариманнынъ достлары, сафдашлары.
