«Okean Elzi» ukrain gruppasınıñ yetekçisi Svâtoslav Vakarçuk Kiyevde keçirilecek «Vatan Sesi» qırımtatar kontsertiniñ musafirleri içün video muracaatını yazdı.
O, kontsertte iştirak etip olamaycağından yazıqsınğanını bildirdi, ve bu vaqıt o, «Okean Elzi» taqımınıñ çetel memleketlerde keçirilecek turda olacağını haber etti.
Video muracaatında Vakarçuk ilân etti ki, Qırımğa er ziyaretini hatırlay, ve qırımtatarlarnıñ musafirçenligini ayrıca qayd etti.
«Qırımğa er ziyaretimni, eñ esas ziyaret olaraq hatırlayım. Bağçasaraynı hatırlayım, Aqmescit ve Aqyarda bu qavehanelerni hatırlayım. Ne de acayip qırımtatar saip ve saibeleri bizni eñ yahşı aşlarnen sıylandı! Bu tebessümlerni hatırlayım, bu muzıkanı hatırlayım…» − dep añlattı Vakarçuk.
Video muracaatı soñunda Svâtoslav Vakarçuk «Obiymı mene» («Meni quçaqla») türküsini qırımtatar tilinde icra etti.
Avdetniñ bundan evel bildirgenine köre, ATR telekanalı Kiyevde ilk qırımtatar yırcılarınıñ gala-kontsertini teşkil etecek. Merasim noyabr 27-de keçirilecek. Aqşam soñunda Ukraina halq yırcısı, «Eurovision-2016» halqara yarışınıñ ğalibi, qırımtatar yırcısı Jamala sanağa çıqacaq.
