Bir yıl içinde Qırımda orta aylıq miqdarı 3 biñ rublege arttı, yani 2015 senesine köre, 14 fayızğa ziyadeleşti.
Bu aqta Krımstat matbuat hımzeti bildire.
Müessiseniñ malümatına binaen, yarımada sakinleriniñ sentâbr ayında orta aylığı 24 763 rubleni teşkil etti.
«Eñ çoq Qırımda maliye saasında çalışqan hadimler qazana – 54,7 biñ ruble, faydalı qazımtılarnı çıqarğanlar – 46,5 biñ, memurlar – 35,1 biñ, musafirhane ve qavehaneler hadimleri – 30,8 biñ ruble ala. Eñ kiçik aylıqlarnı balıq tutqanlar – 11,8 biñ, ve köy hocalığınen oğraşqanlar – 19,6 biñ ruble ala», – dep qayd ettiler matbuat hızmetinde.
Müessisede qayd ettiler ki, ocalarnıñ orta aylığı 16,4 biñ ruble, tibbiy hadimlerniñ aylığı 23,5 biñ rubleni teşkil ete.
Avdetniñ bundan evel bildirgenine köre, Qırım tasil nazirligi yolbaşçılarınıñ ve yarımada aliy oquv yurtları rektorlarınıñ aylıqları millionlar rubleni teşkil ete.
Rosstat malümatına binaen, 2016 senesi iyül ayında Rusiye Federatsiyasında orta aylıq 35 biñ 888 rubleni teşkil etti, Rusiye Federatsiyasında 2016 senesi avgust ayında istimal malları ve hızmetleri qayd etilgen taqımınıñ fiyatı ise, 14 biñ 13 rubleni teşkil etti.
Rusiye Federatsiyasınıñ bazı subyektlerinde orta aylıq ve istimal malları ve hızmetleri qayd etilgen taqımınıñ fiyatı boyunca Rosstat malümatı.
Bundan evel bildirilgenine köre, Qırımda mahsulat fiyatları, Krasnodar vilâyetine köre, yüksekçe, bunıñ sebebi mürekkep logistika ve zayıf raqipliktir.
