Sürgün etilgen qırımtatar faali açlıqnı ilân etti

22.11.201616:15

Noyabr 7-de Qırımdan sürgün etilgen qırımtatar faali, «Qırımtatar qarşılıq areketi» teşkilâtınıñ idarecisi Nedim Halilov açlıqnı ilân etti.

Bu aqta ecnebiy vatandaşlarnı vaqtınca tutma mahsus müessisesi idaresiniñ müdiri adına yazılğan arizada söz yürsetile. Nedim Halilov vesiqanı Facebook saifesinde paylaştı.

Nedim Halilov onı yarımadağa qaytarmasını, bunen beraber, oña milleti «qırımtatar» olğanı qayd etilgen vatandaşlıqsız şahıs statusı berilmesini talap ete.

O haber etti ki, onıñ şartları üç kün içinde ömürge keçirilmek kerek, akis alda o, bütünley aş aşamaqtan ve suv içmekten vazgeçmek mecbur olacaqtır.

«Bugün, 2016 senesi noyabr 21-den qısmiy açlıq ilân etem: ötmek ve suvğa keçem. Talaplarım ömürge keçirilmese, 3 künden soñ, yani 2016 senesi noyabr 24-ten başlap tolu açlıqqa keçerim», – dep ilân etti o.

Avdetniñ evel bildirgenine köre, Nedim Halilov Qırımdan mahkeme qararına binaen çıqarıldı. Sürgün sebebi, Sovet Birligi pasportı oldı. Başqa vesiqalarnı o red etti. O, bir qaç ay devamında Krasnodar ülkesi, Lazarev rayonı, Vardan köyündeki filtratsiya noqtasında bulunacaq, bundan soñ, Özbekistanğa sürgün etilecek.