Fevral 11-de Emir-Üsein Kukunıñ Koreizdeki evinde «Hizb ut-Tahrir işi» boyunca Yaltada yaqalanğanlarğa bağışlanğan dua merasimi keçirildi.
Bu aqta yaqalanğan kişilerniñ soy-sopları Facebook saifelerinde bildire.
Dua, Emir-Üsein Kuku ve daa üç musulmannıñ Qırım cenübinde yaqalanğanından bir yıl tolğanına bağışlanıp, keçirildi.
Toplaşqan adamlar pilâv pişirip, üyle devamında yaqalanğanlar aqqında hatıralarnen paylaşa edi, dep bildire «Qırım.Aqiqat».
«Hizb ut-Tahrir işi» boyunca Yaltada ilk qabaatlanğanlar 2016 senesi fevral 11-de yaqalandı. Olardan eñ belli olğan – İnsan aqları boyunca kontakt gruppasınıñ azası Emir-Üsein Kuku. Ondan ğayrı, qurucı olaraq çalışqanlar Aluştalı Muslim Aliyev ve Qızıltaş (Krasnokamenka) köyü sakini Enver Bekirov, bunen beraber, çiçekler satqan Yaltalı Vadim Siruk yaqalandı. Qızıltaş (Krasnokamenka) köyüniñ sakinleri Refat Alimov ve Arsen Cepparov 2016 senesi aprel 18-de tintüvler keçirilgen soñ yaqalandı. Olar Rusiye Federatsiyası Cinaiy kodeksiniñ 205.5 maddesi 2-ci qısmı boyunca (Rusiyede terroristik tanılğan teşkilâtnıñ faaliyetinde iştirak etüv) qabaatlana.
Avdetniñ bildirgenine köre, «Hizb ut-Tahrir» işi boyunca yaqalanğan, davaları daa devam etken qırımtatarlar, mahkeme daa qarar çıqarmağanına baqmadan, terrorist ve ekstremistler cedveline kirsetildi.
İşbu cedvelde Emir-Üsein Kuku 3415 sanlı, Muslim Aliyev – 468, Arsen Cepparov – 2294, Rustem İsmailov – 2884, Ayder Saledinov – 5199, Refat Alimov – 524, İnver Bekirov – 1231, Zevri Abseitov – 196, Rustem Abiltarov – 188, Enver Mamutov – 3994, Remzi Memetov – 4135, Vadim Siruk – 5362, Teymur Abdullayev – 110, Uzeir Abdullayev – 111 nomeri boyunca qayd etilgen.
Aynı bu cedvelge «Hizb ut-Tahrir» işi boyunca yaqalanğan Aqyarlı dört kişi kirsetildi, 2016 senesi sentâbr ayında olarğa qarşı qarar çıqarıldı. Böyleliknen, Yuriy Primov 4893 nomeri, Ferat Sayfullayev 5176 nomeri boyunca qayd etilgen, Ruslan Zeytullayevniñ işini ise, mahkeme yañıdan baqılmasına yolladı, amma bu qarar rusiyeli maliye nezareti hızmetine onı cedvelge 2608 nomeri ile kirsetmege keder etmedi. Rustem Vaitov ise, belli olmağan sebeplerden bu cedvelge kirsetilmedi.
Foto: Anton Naumlük
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
