Marlen Mustafayev 11 künde yaqalandı

21.02.201721:45

Aqmescitteki (Simferopol) Kiyev rayon mahkemesi fevral 21-de evinde tintüv keçirilgen Aqmescitniñ Boğurça (Kamenka) qasabasınıñ sakini Marlen Mustafayevni 11 künge apiske qapattı.

Mustafayev içtimaiy ağlarda ekstremistik timsallerni qullanğanınen qabaatlandı (Memuriy uquq bozuvı aqqında kodeksniñ 20.3-ci maddesi).

«Radio Svoboda» mühbiri Anton Naumlükniñ malümatına binaen, adliyeciler mahkemeden Mustafayevniñ içtimaiy ağlarda beyanatları boyunca netice çıqarğan ekspertni sorğuğa çekmege rica etti, amma mahkeme bu şefaat arizasını qanaatlendirmekni red etti. Foto ve video çıqaruv içün arizalarnı mahkeme iç te baqmadı, matbuat mahkeme zalına yiberilmedi.

Diñlev çerçivesinde mahkemede «E» Merkeziniñ operativ hadimi Ruslan Şambazov sorğuğa çekildi, o, Qırım adliyecisi Emil Kurbedinovnıñ davasında qayd etilgen edi.

Avdetniñ bildirgenine köre, fevral 21-de Marlen Mustafayevniñ Boğurçada (Kamenka) evinde OMON iştiragi ile tintüv keçirildi. Tintüv keçirilgen yerde yaqalanğan kişilerden arasında Mustafayevge qol tutmaq içün kelgen Osman Arifm, Remzi Bekirov, Ruslan Suleymanov, Riza İzetov, Alim Karimov, Valid Abu Farid, Seyran Murtazayev ve digerleri oldı.

Yanvar 26-da Qırım adliyecisi Emil Kurbedinov Rusiyede yasaq etilgen «Hizb ut-Tahrir» teşkilâtı tarafından teşkil etilgen mitingden 2013 senesi videonı paylaşqanı içün mahküm etilip, 10 künge apis etildi. Bundan evel Kurbedinovnıñ dairesi ve ofisinde tintüv keçirildi.

Aynı qabaatlav boyunca Seyran Saliyev mahküm etildi. O, Rusiye Federatsiyasınıñ Memuriy qanun bozuvları aqqında kodeksiniñ 20.3-ci («Milliyetçi timsallerini, ya da ekstremistik teşkilâtlarnıñ timsallerini, ya da teşviqatı ya halq ögünde kösterüvi federal qanunlarnen yasaq etilgen timsallerni teşviq etüv ya da halq ögünde kösterüv») ve 20.29-ci («Ekstremistik malümatlarnı yapuv ve tarqatuv») maddeleri boyunca qabaatlandı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.