Milletler meseleleri boyunca agentlikniñ reisi qırımtatarlar Ukrainağa köçmege istemegenleri aqqında ayttı

27.02.201718:15

Milletler meseleleri boyunca federal agentlikniñ (MMFA) reisi İgor Barinov ilân etti ki, qırımtatarlar yarımadadan Ukrainağa köçmege istemey.

O, qırımtatar eali temsilcileri arasında agentlik tarafından keçirilgen içtimaiy araştırmanıñ neticelerini taqdim etti. Araştırma iştirakçilerine nevbetteki sualge cevap bermege teklif etildi: «İmkânıñız olsa edi, Qırımnıñ diger meskün yerine, Rusiyeniñ diger regionına, Ukrainağa, diger devletke köçmege ister ediñizmi?»

«Soraştırılğan kişilerniñ 0%-ı ayttı ki, Ukrainağa köçmege ister edi, 82% bildirdi ki, Qırımda qalmağa ister edi, 10% – Qırım içinde diger meskün yerine köçmege ister edi. Daa 2% Rusiyeniñ diger regionına köçmege azır», – dep bildirdi Barinov «İzvestiya» gazetasıa bergen intervyusında.

O, bu köstergiçlerniñ «pek ciddiy» olğanını ayttı. Barinovnıñ sözlerine köre, bu, qırımtatarlarnıñ ayatı eyileşkenini bildire.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası