Mart 5-te Aqmescitte (Simferopol) Zenaat birlikleri medeniyet sarayında «Nesil» ansambli yaş oyuncılarınıñ kontserti keçirildi.
Halq tarihiy vatanına qaytqanınen, milliy sanatımıznıñ kelecekte inkişaf etmesi meselesi de meydanğa çıqtı. Öz vaqtında «Haytarma» ansambli qırımtatar halqını yüksek seviyede temsil etken edi. Amma tecribe nesilden nesilge keçmeli. Ve eñ yahşı çalğıcılar, oyuncılar halq sanatı saasında yaş «fidançıqlarnı» östürip başladı. Oyun, yır ve muzıka ansamblleri teşkil etilip başladı. Milliy telekanal peyda olğanınen, balalar içün çeşit yarışlar keçirilip başladı. Bu, Qırımda pek populâr sayıla. Yarışlarda diger milletler balaları da iştirak ete. Bu saada da halqımız muvafaqiyetli oldı. Böyle ansambllerniñ biri, «Nesil» yaş istidatlar horeografiya ansambli ola. Onıñ reberi Qırım Muhtar Cumhuriyeti mukâfatınıñ laureatı, Qırım Cumhuriyetinde nam qazanğan artist Ernest Prtıhov ola. Ansambl yañı programmanı taqdim etti.
Kontsertte bir qaç yañı sanalaştırma taqdim etildi. Merasimde ara-sıra «Qırımda yaşa – qırımca oyna», «Sen olmasañ…» ve diger videoresimler kösterildi. Seyran 7’62 ve EmCiEl halq sevgen «Qırımda yaşa» yırını icra etti. Ayşe Mustafayeva ve «Ebazer qartbabanıñ» icrasında eki şaqalı monolog seyircilerni pek küldürdi, esli-başlı adamlarnıñ şiveleri o qadar yüksek seviyede ve ustalıqnen seslendirildi! Bir-biriniñ artından halq oyunları taqdim etildi. «Raçuli» Gürcistan oyunı da seyircilerni eglendirdi. Musafirler arasında lotereya yarışı keçirildi.
Elbet, zalda yaş istidatlarnıñ ana-babaları ve çoq soy-sopu oldı. Olar, balalarınıñ ve olarnıñ reberi yapqan işine yüksek qıymet kesti. Sanatımızda muzıka saasında inkişaf etecek yaş nesilimiz öse.
Hatırlatamız ki, 2016 senesi iyün 2-de keçirilgen birinci esabat kontsertinden soñ Ernest Prtıhov «Nesil» ansambliniñ teşkil olunuvı aqqında añlattı.
Enver MURATOV
Foto: Arsen Bahtaliyev
