Mart 30-da Aqmescitte (Simferopol) yaqalanğan faal Riza İzetov ve Аrticle20 resursınıñ mühbiri Taras İbragimov azat etildi.
Bu aqta Qırım adliyecisi Edem Semedlâyev bildirdi.
«Taras İbragimov ve Riza İzetov azatlıqqa çıqtı. Añlağanıma köre, yaqalav sebebi, kimse «E merkezine» telefon etip, bina yanında şübeli şahıslar bulunğanını bildirgeni oldı», – dep qayd etti Semedlâyev.
Adliyeciniñ sözlerine köre, eki yaqalanğan kişiden, olar «E merkezi» yanında neler yapqanı aqqında soradılar, dep bildire «Qırım.Aqiqat».
«Taras yazı şeklinde sorğuğa çekildi. Onıñ Qırımda ne vaqıttan berli bulunğanı, bu yerde neler yapqanı aqqında soradılar. Onıñ şahsiy eşyalarını baqtılar ve telefondan bloknı çıqarmağa rica ettiler. Umumen olaraq, onı tahminen bir saat devamında tuttılar, bundan soñ yiberdiler», – dep qoştı Semedlâyev.
Avdetniñ evel bildirgenine köre, bugün, mart 30-da Aqmescitte (Simferopol) daa bir qırımtatar faali Remzi Bekirov yaqalandı. O, Vkontakte içtimaiy ağında yasaqlanğan malümatnı paylaşqanınen qabaatlana. O, Rusiye Federatsiyası Memuriy qanun bozuvı aqqında kodeksiniñ 20.29-ci maddesi boyunca qabaatlana bile.
Hatırlatamız ki, mart 29-da Aqmescitte Qırım Cumhuriyeti Yuqarı mahkemesi binası yanında maskalı belli olmağan şahıslar qırımtatar kişi Belâl Adilovnı tuttı ve alıp ketti. Faalni alıp ketken adamlar özüni tanıtmadı ve «yaramay davrandı». Yüz bergen vaqianı videoğa çıqarğan şaatlardan biriniñ elinden cep telefonını urıp taşladılar. Belâl Adilov Rusiye Federatsiyası Cinaiy kodeksiniñ 318-ci maddesi 1-ci qısmı (ükümet temsilcisine, ya da onıñ yaqınlarına nisbeten, onıñ iş vazifelerini yapqanınen bağlı, ömür ya da sağlıq içün havflı olmağan zorbalıq etüv, ya da zorbalıq etile bilgeni) boyunca şeklenile.
Foto: Qırım.Aqiqat
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
