«Çiygoznıñ işi» boyunca 105-ci toplaşuvda imaye tarafınıñ şaatı Şevket Memetov añlattı ki, qabaatlanğan kişi 2014 senesi fevral 26-da Qırım Yuqarı Radası binası yanında keçirilgen miting devamında qanunsız areketler etmege çağırmadı.
Bu aqta adliyeci Nikolay Polozov video muracaatında bildirdi.
«O (Şevket Memetov, – Avdet), añlattı ki, 2014 senesi fevral 26-da ATR telekanalınıñ hadimleri ile beraber o, taşınğan televizion studiyasını teminley edi ve vaqialar yüz bergen yerde buluna edi. Şaat Ahtem Çiygoznı kün devamında köre edi, o bildirdi ki, Çiygoz miting iştirakçilerini qanunsız areketler etmege çağırmağan edi, «bas», «ur» sözlerini aytmağan edi, miting iştirakçilerini toqtamağa çağırğan, basmağa çağırmağan edi. Enver Arpatlı ile bağlı ikâyeni añlattı ki, Arpatlı faaliyet köstere edi, Çiygoz ise, onı toqtatmağa tırışa edi», – dep bildirdi Polozov.
Bunen beraber, adliyeci qayd etti ki, şaatnıñ sözlerine köre, ukrain tarafdarı olğan miting iştirakçileriniñ zorbalıq areketlerini alıp barmaq içün aletleri yoq edi.
Avdetniñ evel bildirgenine köre, Ahtem Çiygoz Aqmescit SİZO-sında 2015 senesi yanvar ayından başlap buluna, o, Rusiye Federatsiyası Cinaiy kodeksiniñ 212 maddesi 1-ci qısmı («kütleviy nizamsızlıqnı teşkil etüv») boyunca qabaatlana, madde boyunca qabaatlanğan kişi 10 yılğa qadar apiske qapatıla bile.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
